"Do të ketë pasoja në rast të agresionit rus në Ukrainë", paralajmëroi Sekretari i Shtetit i SHBA-së, Antony Blinken, duke shprehur "shqetësimin" e Shteteve të Bashkuara për ndërtimin e forcave ruse në kufirin e Ukrainës.
"Ka më shumë trupa ruse në kufi se kurrë që nga viti 2014, gjatë pushtimit të parë rus", tha Blinken në një intervistë të botuar nga NBC të dielën dhe përsëriti vlerësimin e kësaj jave në Shtëpinë e Bardhë.
Presidenti Joe "Biden ishte shumë i qartë: nëse Rusia vepron në mënyrë të pamatur ose agresive, kjo do t'i kushtojë shtrenjtë, do të jetë pasojë", shtoi ai, raporton politico.
Antony Blinken, i cili foli në telefon me homologët francezë dhe gjermanë mbi çështjen, theksoi se "Shtetet e Bashkuara dhe partnerët evropianë ndajnë të njëjtat shqetësime".
Lufta në Donbas, e cila filloi në prill të 2014 pas revolucionit pro-perëndimor në Ukrainë dhe aneksimit rus të Krimesë, vrau më shumë se 13 mijë njerëz dhe zhvendosi rreth 1.5 milion.
Intensiteti i konfliktit ra pas marrëveshjeve të paqes në Minsk në vitin 2015, por nuk u gjet asnjë zgjidhje politike. /Telegrafi/