Agjenti i Gonzalo Higuainit ka arritur në Itali për bisedimet përfundimtare me Juventusin që do t’ia mundësojnë argjentinasit t’i bashkohet Inter Miamit.
Sipas Sky Sport Italia, Tuttomercatoweb dhe mediave tjera, Nicolas Higuain – vëllai i lojtarit, i cili njëherësh e përfaqëson atë – të hënën ka arritur në Itali dhe gjatë të martës do të diskutojë me drejtorët e klubit lidhur me ndërprerjen e kontratës.
Kontrata aktuale e Higuain është valide deri në qershor 2021, prandaj pritet të vendoset vetëm për shumën e parave që do të marrë sulmuesi nga paga e tij prej shtatë milionë eurosh.
Pasi të zgjidhet kjo çështje, 32-vjeçari do të jetë lojtar i lirë për të nënshkruar për një klub të ri, që me shumë mundësi do të jetë klubi i David Beckhamit në MLS.
Trajneri Andrea Pirlo e ka njoftuar qartë Pipitan se nuk bën pjesë në planet e tij te Juventusi. /Telegrafi/