Amerikani shkoi për të takuar të dashurën, përdori një mënyrë interesante për të “mashtruar” policinë gjermane në aeroport

Tentimi i një të riu amerikan për të vizituar të dashurën e tij në Gjermani u ndalua nga punonjësit e aeroportit në Frankfurt, tha të martën policia e aeroportit.

Gjermania mban një lidhje të trafikut ajror me SHBA-në, por shumica e shtetasve amerikanë nuk lejohen të hyjnë në vend nën kufizimet aktuale të udhëtimit.

Gjithsesi, sipas DW, përcjell Telegrafi, qeveria gjermane bën përjashtime për banorët gjermanë ose familjarët e shtetasve gjermanë.

Kështu duke parë se ishte gati e pamundur të bënte një gjë të tillë në mënyrë legale, një 20-vjeçar fluturoi në Aeroportin e Frankfurtit të dielën dhe më pas u përpoq të maskohej si pastrues në mënyrë që të kalonte pikën e kontrollit të sigurisë së aeroportit.

Siç bëhet e ditur, burri veshi një jelek reflektues dhe kapi dy qese plehrash të zeza dhe u drejtua drejt pikës së kontrollit, duke u shtirur se ishte aty për të zbrazur mbeturinat.

Sidoqoftë, një “punonjëse e kujdesshme” vuri re se burri nuk kishte kartë identiteti dhe se ai gjithashtu nuk mund të fliste gjermanisht.

Ajo informoi policinë, e cila nga ana e saj ndaloi shtetasin amerikan, autoritetet thanë në raportin e tyre.

Kur u mor në pyetje nga policia, burri pranoi se ai e përdori “mashtrimin” sepse nuk pa mundësi ligjore të shihte të dashurën e tij me qendër në Gjermani.

Sipas policisë, burri nuk do të ishte në gjendje të hynte në vend edhe nëse ai do të arrinte të përvidhej në kalimin e pikës së kontrollit të sigurisë, pasi ai do të ishte akoma në zonën e tranzitit të aeroportit dhe do të duhet të kalojë nëpër një pikë kontrolli të veçantë kufiri, të menaxhuar nga policia.

Pas kësaj ai ishte kthyer në SHBA hënën, përmes një fluturimi, thanë autoritetet. /Telegrafi/