Ambasadori gjerman: “Ballkani i Hapur” nuk po duket të jetë iniciativë gjithëpërfshirëse

Ambasadori gjerman, Jorn Rohde, ka thënë se kancelari gjerman po e promovon Procesin e Berlinit, sepse e kanë filluar ata, mirëpo shton se nuk do të kritikojnë shtetet që duan të fuqizojnë bashkëpunimin rajonal përmes iniciativës së “Ballkanit të Hapur”.

Por ngrit pyetjen nëse do të jetë ajo iniciativë gjithëpërfshirëse, sepse siç tha ai, “për momentin kjo nuk po duket e tillë sepse janë disa vende që nuk janë pjesë e ‘Ballkanit të Hapur’”.

“Në të gjitha vizitat e tij gjatë javës së kaluar, Kancelari ka qenë i qartë që dëshiron ta ringjallë Procesin e Berlinit, dhe e tha këtë edhe në konferencën për shtyp që u mbajt këtu. Së dyti, këto nuk janë vetëm fjalë por vepra konkrete për konferencën që do të ftohet e veçanërisht rreth çështjeve që duhen diskutuar për tregun regjional”, tha ai.

“Ne e kemi filluar Procesin e Berlinit, Kancelari ynë po e promovon Procesin e Berlinit, prandaj është e qartë. Mirëpo ne asnjëherë nuk do të kritikojmë shtetet që duan të fuqizojnë bashkëpunimin rajonal. Pyetja kryesore është se a do të jetë ajo iniciativë gjithëpërfshirëse, ndërsa për momentin kjo nuk po duhet e tillë sepse janë disa vende që nuk janë pjesë e Ballkanit të Hapur. A kemi nevojë për një proces tjetër? Në anën tjetër, në disa raste ndodh që të krijohen procese paralele në rast se opsioni i parë nuk funksionon”, tha ambasadori Rohde, për “Kallxo.com”.

Sipas ambasadorit, agjenda e Procesit të Berlinit në vjeshtë do të jetë tregu rajonal, njohja e diplomave. Kjo sipas tij do të jetë mes vendeve të Ballkanit Perëndimor.

“Prandaj, ne duhet të kanalizojmë të gjithë energjinë tonë që procesi i parë të funksionojë. Kjo është e ngjashme me dështimin e Organizatës Botërore të Tregtisë që të vendosë një regjim botëror prandaj që 50 vjet, marrëveshje tregtare dalin gjatë gjithë kohës, prandaj në politikë, shpeshherë opsionet e dyta mbesin opsioni i vetëm që mund t’i qasemi”, shtoi ai.

“Dy çështje, së pari në vjeshtë do të mbahet konference e udhëheqësve të cilën do ta ftojë Kancelari. Kur të ftohen udhëheqësit e regjionit natyrisht që priten edhe rezultate, prandaj edhe ekzistojnë diplomatët që punojnë në prapavijë me shpresë që të garantojnë se të gjashtë liderët e Ballkanit Perëndimor dhe anëtarët e Procesit të Berlinit nuk do të ulen në atë tavolinë duke e ditur që nuk do dalë asgjë nga ai takim”, ka thënë ambasadori gjerman.

Lexo po ashtu “Ballkani i Hapur” apo Procesi i Berlinit, deklarata e kancelarit gjerman

Procesi i Berlinit është krijuar më 2014 mes rritjes së euroskepticizmit dhe vendimit të atëhershëm të BE-së që nuk do të ketë pranim të anëtarëve të rinj në pesë vitet e ardhshme.