Ambasada amerikane mirëpret vendimin e Kushtetueses, për pezullimin e dekretit të presidentit Thaçi

Ambasada e SHBA-së në Prishtinë, ka përshëndetur pezullimin e dekretit të presidentit Hashim Thaçi, nga Gjykata Kushtetuese.

Me anë të një postimi në Twitter, kjo ambasadë thotë se veprimi i fundit i Gjykatës është tregues i funksionimit të sundimit të ligjit.

“Përgjigjja e Gjykatës Kushtetuese për të dhënë kohë për diskutime tregon sundimin e ligjit të Kosovës në punë. Ne gjithashtu mirëpresim thirrjet e liderëve politikë dhe institucionalë për të respektuar Gjykatën Kushtetuese dhe proceset e saj”, thotë ambasada.

Ndërkaq, të premten Gjykata, në mbështetje të nenit 116.2 të Kushtetutës, të nenit 27 të Ligjit për Gjykatën Kushtetuese dhe të rregullit 57 të Rregullores së punës, më 1 maj 2020, me shumicë votash, vendosi të miratojë masën e përkohshme në kohëzgjatje deri më 29 maj 2020 nga data e nxjerrjes së këtij vendimi.

Me vendimin e Kushtetueses u pajtuan krerë politikë pozitë e opozitë, të cilët thanë se duhet respektuar gjithherë vendimet e GjK-së, çfarëdo qofshin ato. /Telegrafi/

The Constitutional Court’s response to allow time for deliberations shows Kosovo rule of law at work. We also welcome the calls by political and institutional leaders to respect the Court and its processes.

— U.S. Embassy Pristina (@USEmbPristina) May 2, 2020