Mbrojtësi i majtë i Bayern Munichut, Alphonso Davies, duket se është afër një lëvizjeje te Real Madridi këtë verë, pasi agjenti Nedal Huoseh sulmoi klubin bavarez për taktikat e tyre të negociatave.
22-vjeçarit kanadez i skadon kontrata në vitin 2025, dhe ndërsa Bayern dëshiron të rinovojë marrëveshjen e tij, ata kanë vendosur një afat deri në fund të muajit për të zgjidhur çështjen.
Ndërkohë Real Madridi qëndron në pritë, duke shpresuar të përfitojë nga situata në verë, pasi Bayerni e ka pasur të qartë se do të shesë nëse Davies nuk pranon një ofertë të re.
Agjenti i lojtarit, Huoseh shpjegoi se menaxhimi i situatës nga Bayern ka bërë që palët të mos arrijnë një marrëveshje rinovimi deri tani.
“Nuk është e drejtë që ata të sulmojnë Alphonson tani. Ne ishim afër arritjes së një marrëveshjeje një vit më parë. Më pas u zëvendësua i gjithë drejtimi i klubit. Ne nuk dëgjuam asgjë për shtatë muaj. Edhe pse gjatë kësaj kohe u përpoqa të kontaktoja vetë klubin”, ka thënë fillimisht agjenti për Bild.
“Tani ata na japin një ultimatum dhe ne duhet të reagojmë pas dy javësh, sepse klubi është nën presion dhe ka marrë shumë kohë për të riorganizuar departamentin e tyre të menaxhimit? Kjo nuk është e drejtë”, përfundoi Huoseh.
✅ Alphonso Davies does not want to accept the offer of FC Bayern for a new contract within the ultimatum
❇️ Bayern offer a salary of €14 Mio per year
❇️ Davies demands up to €20 Mio Euro
❇️ a transfer to Real Madrid is becoming more and more likely— Christian Falk (@cfbayern) March 28, 2024
Sipas Christian Falk të Bild, Bayern ka arritur në 14 milionë euro me ofertën e tyre të rinovimit, ndërsa Huoseh vazhdon të kërkojë 20 milionë euro në vit. Kampi i Davies nuk dëshiron t’i përgjigjet ofertës brenda afatit, dhe Real Madridi është në ‘pole-position’ nëse asgjë nuk ndryshon.
Davies është padyshim një nga mbrojtësit e majtë më të mirë në botë, dhe Real Madridi e ka dashuruar atë për pjesën më të mirë të një viti. Ndërkohë kërkesat e Davies për Bayernin thuhet se do të ishin afër dyfishit të asaj që do të fitonte në kryeqytetin spanjoll. /Telegrafi/