Allegri flet për fitoren e tetë radhazi në kampionat, paralajmëron edhe Napolin për ndeshjen e ardhshme

Juventusi ka marrë një fitore me shumë vuajtje ndaj Udineses, pasi e mposhti me rezultat minimal 1-0.

Ka mjaftuar një gol i Danilos në fund të ndeshjes nga afërsia për t’i dhënë tre pikë të mëdha Zonjës së Vjetër në përballje me skuadrën tjetër bardhezi.

Trajneri i Juventusit, Massimiliano Allegri ka folur për fitoren duke thënë se janë duke bërë një rrugëtim të bukur pasi tani kanë tetë fitore radhazi në kampionat.

“Jemi duke bërë një rrugëtim që për momentin është i bukur. Në Kremona kemi bërë një paraqitje të mirë, ndërsa ndaj Udineses kemi bërë akoma edhe më mirë. Në pjesën e dytë jemi rritur dhe kemi krijuar raste”.

“Jemi në një gjendje të mirë fizike, por mbi të gjitha mendore. Duhet të vazhdojnë të punojmë në heshtje, morëm në fitore të rëndësishme”, u shpreh Allegri.

Allegri ka folur edhe për argjentinasin Angel Di Maria, i cili ndaj Udineses u rikthye nga një lëndim.

“Di Maria ka luajtur 60-70 minuta në nivele të mira. Vinte nga një moment që ishte ndalur për shkak të kushteve fizike. Ka bërë një paraqitje të mirë dhe jam i lumtur me të, por jam i lumtur gjithashtu me të gjithë djemtë, kanë luajtur me zemër dhe dëshirë. Është e rëndësishme që t’i rikuperojmë të gjithë, sepse kemi nevojë të rikuperojmë energji fizike dhe mentale”, tha Allegri.

Tutje Allegri foli edhe për objektivat e Juves ku të premten luajnë pikërisht ndaj liderit Napolit dhe synojnë fitore për ta shkurtuar edhe më shumë diferencën.

“Të premten do të jetë një ndeshje e bukur. Në Napoli është gjithmonë bukur të luash, por ne duhet të mendojmë hap pas hapi. Napoli është gjithmonë favorit për titullin kampion. Nëse duam të rrisim pritshmëritë, duhet edhe të përmirësojmë paraqitjet”, deklaroi trajneri italian. /Telegrafi/