Ahmeti lavdëron paraqitjen e Kurtit dje në dialog: Ishte më e mirë sesa punët qysh i kemi si shtet

Të hënën, u zhvillua rundi i radhës i bisedimeve midis Kosovës dhe Serbisë për normalizimin e marrëdhënieve. Kryeministri i Kosovës, Albin Kurti, është takuar për të dytën herë me presidentin Aleksandar Vuçiqit, në Bruksel.

Kurti, tha se ka propozuar një marrëveshje me gjashtë nene, si deklaratë e paqes midis Kosovës dhe Serbisë, ajo ishte refuzuar ende pa u lexuar.

Në Deklaratën e Paqes, ndër të tjera, përfshihej zotimi mes Kosovës dhe Serbisë që të mos e sulmojnë ushtarakisht njëra tjetrën. Po ashtu, në dokument përmendej edhe njohja reciproke si rezultat i marrëveshjes finale Kosovë-Serbi.

Për paraqitjen e Kurtit, ka folur ish-bashkpartiaku i tij, kryetari aktual i Prishtinës, Shpend Ahmeti.

Ahmeti në një shkrim në Twitter, ka lavdëruar Kurtin, duke thënë se paraqitja e tij kundër Vuçiqit, ishte shumë e mirë.

“Jepni vlerësim aty ku duhet! Paraqitja e Kosovës – Albini dje në dialog ishte super e mirë. Më e mirë se sa punët qysh i kemi si shtet!”, shkroi ai.

Ahmeti po ashtu i kishte dalë në mbrojtje Kurtit pas kritikave që ky i fundit mori, që votoi në zgjedhjet lokale të 25 prillit në Shqipëri.

Kreu i Prishtinës kishte thënë se me Kurtin nuk pajtohet në shumë gjëra, por votimi në Shqipëri nuk është një prej tyre.

Ndryshe, parqitjen e Kurtit në Bruksel e ka kritikuar opozita, të cilët janë skeptik se do të ketë përparim në vazhdimin e dialogut.

Sipas tyre, Kurti nuk po negocion, por thjesht po bisedon në takimet e tij në Bruksel mbi dialogun Kosovë-Serbi. /Telegrafi.

Give credit where it is due!
Paraqitja e Kosovës – Albinit dje në dialog ishte super e mirë. Më e mirë se sa punët qysh i kemi si shtet!
???

— Shpend Ahmeti (@ShpendA) July 20, 2021