Me afrimin e Olimpiadës, Parisi nxjerr 75,000 trupa në rrugë – dislokimi më i madh në kohë paqeje i forcave të sigurisë në historinë franceze

Një grumbull turistësh të zhgënjyer vështronin përmes labirintit të gardheve metalike që “rreshtoheshin” anash lumin Seine.

Përpara tyre, katedralja Notre Dame dhe thesare të tjera parisiane janë bërë, gjithashtu, të paarritshme.

Më tej, pranë Kullës Eifel, një çift i lodhur bëri një kthesë të ngadaltë në një trotuar të mbushur me njerëz.

“E mbyllur. Do t’ju duhet të ecni përreth”, sapo u kishte thënë një xhandar francez, duke bërë me shenjë drejt jugut.

Ndërsa Parisi përgatitet për ceremoninë e tij unike të hapjes olimpike, policia dhe forcat e armatosura të vendit po vendosin masat e fundit për një operacion të paprecedentë sigurie, shkruajnë mediat e huaja, përcjell Telegrafi.

“Ne jemi gati”, deklaroi presidenti Emmanuel Macron.

Dhe sipas mediave, operacioni i sigurisë përfshin dislokimin më të madh në kohë paqeje të forcave të sigurisë në historinë franceze, me deri në 75,000 policë, ushtarë dhe roje të punësuar në patrullë në Paris në çdo kohë.

Atje, rrugët dhe stacionet e metrosë janë mbyllur. Janë ngritur rreth 44,000 barriera. Dhe një sistem i përpunuar i kodeve QR është krijuar për banorët dhe të tjerët që kërkojnë qasje në disa zona.

Në mënyrë të pashmangshme, ka pasur probleme dhe zhgënjime në një qytet që zakonisht do të mbushej me turistë të huaj.

Por autoritetet franceze këmbëngulin se ndërprerja do të jetë e shkurtër – shumë nga barrikadat përgjatë Seine do të hiqen pas ceremonisë së hapjes të së premtes.

“Nuk do ta përshkruaja si një makth. Jemi të përqendruar dhe të vendosur”, tha gjenerali Lionel Catar me gjysmë buzëqeshje.

Ai është përgjegjës për koordinimin e punës së rreth 5,500 trupave franceze të sjellë në kryeqytet.

“… Ne kemi ekipe qensh. Ka sisteme anti-drone, radarë dhe zhytës që patrullojnë lumin Seine”, tha gjenerali Catar.

Veç tyre, rreth 250 oficerë britanikë – dhe 50 qen policie – do të jenë në Francë gjatë javëve të ardhshme, me disa që do t’i bashkohen patrullave franceze në këmbë rreth qendrës së Parisit.

Ata janë mes 1750 policëve të huaj nga dhjetëra vende që marrin pjesë në operacion, duke përfshirë Spanjën, Gjermaninë, Korenë e Jugut dhe Katarin.

Ka pasur gjithashtu bashkëpunim të drejtpërdrejtë ushtarak midis Francës dhe Mbretërisë së Bashkuar për teknologjinë anti-drone, veçanërisht gjatë ceremonisë së hapjes.

Zyrtarët francezë thonë se nuk ka pasur kërcënime specifike ndaj Lojërave, por se ata janë të shqetësuar për “terrorizmin e militarizuar” – qoftë nga jashtë ose brenda Francës.

Ata janë gjithashtu të fokusuar në rrezikun e sulmeve kibernetike që mund të synojnë sistemet e biletave dhe infrastrukturën tjetër.

Në muajt e fundit qeveria ka shprehur zemërim në rritje ndaj asaj që beson se është një fushatë në internet e mbështetur nga Kremlini për të ngritur frikë të ekzagjeruar për sigurinë dhe për gatishmërinë franceze në Lojërat Olimpike.

“Ndërhyrja dhe shtrembërimi i informacionit nuk po kryhet vetëm nga Rusia, por edhe nga vende të tjera që ne po i vëzhgojmë nga afër. Ne nuk jemi naivë. Shpresojmë se do të respektohet një armëpushim olimpik…. nga të gjitha vendet”, tha Gerald Darmanin, ministri i brendshëm i Francës.

Të martën, policia franceze arrestoi një rus të dyshuar për komplot të akteve të “destabilizimit” gjatë Lojërave.

Më herët në të njëjtën ditë, në periferi të Parisit, një skuadër elitare e policisë franceze kreu një tjetër provë për një situatë pengjesh në një autobus.

Mes të “shtënave me armë dhe shpërthimeve të forta”, njësia – e njëjta që iu përgjigj sulmit të Bataclan të vitit 2015 – shpëtoi aktorë civilë të bllokuar brenda autobusit.

“Ne ndihemi të paduruar. Ne kemi kaluar më shumë se dy vjet duke u përgatitur për këto Lojëra. Le të shpresojmë se nuk do të duhet të ndërmarrim asnjë veprim”, tha komandanti i njësisë, Simon Riondet. /Telegrafi/