Abdixhiku: Me Qeverinë Kurti, pozicioni ndërkombëtar i Kosovës është rënduar

Kryetari i Lidhjes Demokratike të Kosovës, Lumir Abdixhiku, ka thënë se pozicioni ndërkombëtar i Kosovës është rënduar gjatë qeverisjes së Albin Kurtit.

Sipas tij, tani nuk flitet për njohje të ndërsjellë me Serbinë e as për marrëveshje përfundimtare.

Këto deklarime Abdixhiku i ka bërë gjatë një takimi në Viti, në kuadër të ciklit debatues e diskutues “LDK ju dëgjon”, ku lideri i LDK-së ka diskutuar me qytetarë dhe struktura të kësaj komune.

“Me veprimet e pamatura, pa qenë i koordinuar në mënyrë të vazhdueshme me aleatë, Kryeministri e ka larguar Kosovën nga ky synim. Më 7 shkurt të vitit 2021, Presidenti i Shteteve të Bashkuara të Amerikës Joe Biden, nëpërmjet një letre urimi, i kishte kërkuar Presidentit të Serbisë Vuçiq, arrtijen e një marrëveshje gjithëpërfshirëse me Kosovën të përqendruar në njohjen e ndërsjellë”.

“Saktësisht dy vite me Qeverinë Kurti, dhe pozicioni ndërkombëtar i Kosovës duket qartazi i rënduar. Nuk flitet për njohje të ndërsjellë dhe nuk flitet për një marrëveshje përfundimtare. Tani flitet për marrëveshje bazë që nuk e ka njohjen reciproke”, ka thënë ai.

Ai po ashtu ka theksuar se “përveç Kryeministrit, askush nuk e di se çka po diskutohet. Nuk dihet çka përmban hyrja e marrëveshjes dhe as shtojca e kësaj marrëveshje. Tema të tilla duhet të trajtohen me përgjegjësi dhe nga Kryeministri do të kërkohet përgjegjësi”.

Gjatë këtij takimi Abdixhiku ka rikonfirmuar edhe njëherë qëndrimin e LDK-së rreth procesit të dialogut.

“Qëndrimi i LDK-së për procesin e dialogut është që duhet të ketë marrëveshje përfundimtare që në thelb ka njohjen e ndërsjellë ndërmjet dy vendeve. Marrëveshja duhet të jetë ligjërisht e ndërkombëtarisht e obligueshme dhe duhet të përmbajë aktin kur Serbia e njeh Kosovën, dhe kur Kosova ndërsjellazi e njeh Serbinë.

Çdo devijim nga ky orientim strategjik është përgjegjësi e pariparueshme e Qeverisë aktuale”, ka deklaruar tutje i pari i LDK-së.

Sipas tij, LDK-ja është në drejtim të mbarë dhe çdo ditë po shton radhët e veta, “sepse po dëgjon, po flet me qytetarë dhe po qëndron përballë popullizmit; ndërsa forcimi i LDK-së është ndryshimi që i duhet Kosovës”. /Telegrafi/