14 vjet nga masakra në Rogovë

Në muajin janar 1999 janë kryer tri raste të ekzekutimit në masë të shqiptarëve nga forcat ushtarake dhe paramilitare serbe në Kosovë. Kurse sot bëhen katërmbëdhjetë vite nga masakra në fshatin Rogovë të Gjakovës, ku forcat ushtarako-policore serbe vranë 26 shqiptarë.

Sipas dëshmitarëve, që i kishin shpëtuar kësaj masakre, atë ditë, rreth orës 05.30, ushtarët, policët e paramilitarët serbë, pasi e kishin futur në rrethim të hekurt tërë fshatin, kanë hyrë nëpër shtëpitë e fshatit, i kanë bastisur e demoluar, transmeton KP.

Popullata, e gjendur para kësaj katrahure, kishte filluar të arratisej në drejtime të ndryshme ose të strehohej ku mundej. Atëherë ushtarakët e paraushtarakët dhe policët serbë vranë e masakruan kë mundën dhe ku mundën.

Atë ditë u vranë e masakruan, Agron dhe Sejdi Rama nga Smolica e Gjakovës, Gëzim Ademaj nga Ratisha e Deçanit, Agush Gjoci nga Raushiqi i Pejës, Agim Zeneli dhe Luan Islami nga Shqiponja e Dushkajës, Sahit Krasniqi nga Ratkoci i Përdrinit, Daut Zagraxha nga Banja e Burimit, Haxhi Lipjani nga Kleçka e Malishevës, Valon Gashi nga Buçani i Pejës, Vesel Avdyli nga Drenoci i Klinës, Emrush Çeta nga Turbovci i Burimit, Bahtjar Morina nga Lubizhda e Malishevës dhe Naim Dreshaj nga Vrella e Burimit. Që të gjithë ishin ushtarë nga Zona Operative e Dukagjinit dhe ajo e Pashtrikut.

Në mëngjesin e 29 janarit forcat kriminale serbe në Rogovë në shtëpitë e tyre masakrojnë: Rrustem Morinën me 3 djemtë Selmanin, Nysretin dhe Mehmetin, pastaj Ibrahim Kryeziun, Adem, Rifat dhe Zyber Shalën.

Ndryshe, në janar ka ndodhur edhe masakra në Reçak të Shtimjes, ku u vranë e u masakruan mizorisht 45 shqiptarë. Kurse, Masakra e Rakovinës ndodhi më 24 janar, rreth orës 21.00, në afërsi të urës së Rakovinës në rrugën magjistrale Prishtinë – Gjakovë.

Policia serbe, pa asnjë pretekst, pati vrarë me armë automatike nga autoblinda Shaban T. Kelmendin (45) dhe fëmijët e tij Haxhiun (11) e Besimin (12) nga Rakovina dhe Hysen e Sanije Kurtin (30) nga Cërmjani, që ishin mysafirë të Shabanit dhe po ktheheshin me traktor në Cërmjan. /Telegrafi/