Zgjedhjet duhet të jenë sipas standardeve

Reforma në drejtësi, reforma zgjedhore dhe dekriminalizimi kanë qënë në fokus të takimit të kryetarit të Kuvendit Ilir Meta me ambasadorin amerikan Donald Lu.

Kjo u konfirmua nga vetë kreu i Kuvendit në një dalje për mediat ku konfirmoj dhe njëherë vullnetin për bashkëpunimin për zbatimin e reformës në drejtësi. Në takim tha ai u theksua dhe rëndësia e standardit të zgjedhjeve të ardhshme dhe përpjekjet për zbatimin e rekomandimeve të OSBE-ODIHR.

“Takimi u fokusua në rëndësinë e zgjedhjeve të ardhshme, standardit të tyre dhe në përpjekjen që duhet bërë për të mbyllur reformën zgjedhore në përputhje dhe me rekomandimet e OSBE-ODIHR, po dhe rëndësinë e vazhdimit të procesit të dekriminalizimit si mjaft jetik për standardin e zgjedhjeve të ardhshme”, tha Meta.

Edhe Ambasada e Shteteve të Bashkuara në Tiranë ka reaguar përmes një njoftimi online: “Ambasadori Donald Lu dhe Kryetari i Kuvendit Ilir Meta zhvilluan një takim pozitiv sot. Ambasadori Lu u angazhua të vazhdojë të punojë ngushtë me parlamentin për zbatimin e reformës në drejtësi. Ambasada e SHBA ka besim të madh që me mbështetjen e Kryetarit të Kuvendit Meta, Shqipëria do të realizojë këtë reformë historike për të gjithë shqiptarët. Kryetari i Kuvendit Meta dhe Ambasadori Lu diskutuan gjithashtu edhe për rëndësinë e reformës zgjedhore dhe procesin e dekriminalizimit”. /Telegrafi/