Zëdhënësi i LVV-së: Do të ishte naivitet po të mendohej se koalicioni do bëhej me lehtësi

Zëdhënësi i Lëvizjes Vetëvendosje, Arlind Manxhuka konsideron se mos bërja e koalicionit LVV-LDK, është edhe si shkak i pengesave nga siç e ka quajtur ai, “shteti i kapur”.

Përmes një shkrimi në Facebook, ka thënë se do të ishte naivitet po të mendohej se koalicioni do të bëhej me lehtësi.

“Në instancë të fundit ky koalicion po përballet me pengesat që t’i vendos një shtet i kapur.

Do të ishte naivitet po të mendohej se me lehtësi do të bëhej koalicioni e pastaj do të përballeshim me ata që kanë kapur shtetin.

Kjo është para-sfida. Meqenëse popullin nuk e ndalen dot me 6 tetor, kjo është përpjekja tjetër”, ka shkruar Manxhuka, njofton Telegrafi.

Por zyrtarët e Vetëvendosjes përfshirë Albin Kurtit vazhdimisht kishin thënë se koalicioni do të ndërtohej shpejt. Madje, Kurti një ditë pas zgjedhjeve kishte thënë se koalicioni do të nënshkruhet më së largu 100 orë pas certifikimit të zgjedhjeve të 6 tetorit.

LVV dhe LDK, kanë dështuar të arrijnë marrëveshje edhe më shumë se tre muaj prej se kanë përfunduar zgjedhjet. Madje, s’janë pajtuar për ndarjen e pozitave as pas votimit të Kryetarit të Kuvendit në fund të vitit të kaluar. Prej gjashtë muajsh, Kosova vazhdon të funksionojë me Qeveri në dorëheqje.