Zbulohet ajo çfarë pret Florentino Perez nga “Santiago Bernabeu” – do të ishte diçka historike

Stadiumi “Santiago Bernabeu” i Real Madridit është tashmë plotësisht funksional pas rinovimeve.

Sipas MARCA , stadiumi pritet të sjellë rreth 1 milion euro në ditë këtë sezon, duke kombinuar të ardhurat e ditëve të ndeshjeve, ngjarjet dhe turnetë.

Kjo mund të arrijë në 354 milionë euro, duke mbuluar rreth 29 për qind të të ardhurave të parashikuara të klubit prej mbi 1.1 miliard euro.

Sezonin e kaluar, Bernabeu nuk ishte me kapacitet të plotë, megjithatë 1.8 milion tifozë ndoqën ndeshjet.

Me stadiumin tashmë plotësisht të hapur, kërkesa për bileta është më e lartë se vendet e disponueshme. Restoranti “VIP Sky Bernabeu” është ende në pritje për shkak të çështjeve ligjore, por mund të shtojë 10 milionë euro në vit kur të hapet.

Vendet VIP gjeneruan 83 milionë euro sezonin e kaluar, me çmimet e biletave që varionin nga 300 euro për ndeshjet e ligës deri në 2,000 euro për vendet premium të Ligës së Kampionëve. Në të ardhura kontribuojnë edhe dyqanet e stadiumit, të cilat qëndrojnë të hapura deri në mesnatë në ditët e ndeshjeve.

Vitin e ardhshëm, Real Madrid planifikon të zgjerojë ofertat e tyre të mikpritjes me tarraca luksoze dhe zona ekskluzive të ngrënies.

Me këto zhvillime, Bernabeu do të jetë një nga burimet më të mëdha të të ardhurave të futbollit. /Telegrafi/