Zaev në takim me Merkelin: Bundestagu në shtator do të sjell vendim për nisjen e negociatave me BE-në (Video)

Delegacioni i Qeverisë së Maqedonisë së Veriut, i udhëhequr nga kryeministri Zoran Zaev, së bashku me zv.kryeministrin për Çështje Evropiane Bujar Osmani dhe ministrin e Punëve të Jashtme Nikolla Dimitrov, sot kanë realizuar takim me kancelaren gjermane Angela Merkel.

Siç njoftojnë nga Qeveria, Merkel në takim ka thënë se Bundestagu do të sjell vendim në shtator për miratimin e nisjes së negociatave të BE-së me Maqedoninë e Veriut, në pajtim me procedurat e Gjermanisë për zgjerimin e Unionin, njofton Telegrafi Maqedoni.

Në takim Merkel ka potencuar se Maqedonia e Veriut e ka përmbushur atë që është pritur dhe se Berlini sheh shumë gjëra pozitive.

Ndërsa Zaev në takim ka thënë se Maqedonia e Veriut ka besim të plotë në kancelaren Merkel dhe e mbështet politikën e saj për zgjerimin e BE-së, si dhe politikat e saj për Ballkanin Perëndimor.

Në takim është thënë se Gjermania është partner strategjik i Maqedonisë së Veriut, me të cilën do të punohet për stabilitetin dhe paqen në Ballkan.

Qeveria e Maqedonisë së Veriut në njoftim shprehet e bindur se këtë vit shteti do të fillojë negociatat për anëtarësim në Bashkimin Evropian.

Pas takimit Zaev dhe Merkel nuk kanë dhënë deklaratë për media, ndërsa opinioni është njoftuar përmes komunikatave./Telegrafi/