Të shtunën, Barcelona rikthehet në fushë me një derbi katalanas, teksa përballet me Gironën në “Estadi Lluis Companys”.
Ndeshja do të ketë një domethënie të veçantë për Eric Garcian, i cili do të përballet me klubin ku luajti gjatë sezonit 2023/2024.
Në prag të sfidës, Eric ka folur për Sport rreth ish-klubit të tij, duke reflektuar mbi kohën e kaluar në Montilivi, një periudhë e suksesshme për të gjithë.
“Kalova një vit të mrekullueshëm atje. Bëmë një sezon që do të hyjë në histori, duke e kualifikuar Gironën për në Ligën e Kampionëve. Kishim një skuadër të jashtëzakonshme, edhe në aspektin njerëzor. Míchel më ndihmoi shumë në karrierë. U them shpesh këtë dhe u uroj gjithë të mirat”, u shpreh Garcia.
Eric, i cili ka tërhequr interes nga Paris Saint-Germain së fundmi, u pyet gjithashtu për përpjekjet e Gironës për ta rikthyer sërish.
Hansi Flick/Eric Garcia
“Sezonin e kaluar pati një moment kur nuk po merrja shumë minuta. Sigurisht që pata opsionin për t’u kthyer te Girona, e dija që Michel ishte ende atje. Në fund, mendoj se u mor vendimi i duhur”, deklaroi ai.
Ai zbuloi gjithashtu se ka pasur bisedime me trajnerin Hansi Flick, i cili ka qenë faktori kryesor për qëndrimin e tij te Barcelona sezonin e kaluar. Sipas Eric, aftësia për të luajtur në disa pozicione ndikoi në vendimin e trajnerit.
“Mendoj se ndeshja që ndryshoi gjithçka ishte ajo ndaj Benficës, sepse afati kalimtar ishte ende i hapur në atë kohë. Ajo ndeshje ndryshoi situatën”.
“Ka ndeshje, nuk e di pse, por ndryshojnë gjithçka, dhe mendoj se ajo ishte pika ku mësova të kap mundësitë dhe të fitoj besimin e trajnerit”, përfundoi spanjolli./Telegrafi/
