Vritet një anëtar i lartë i një grupi kriminal në Mal të Zi

Një nga anëtarët e lartë të grupit krimal të Malit të Zi, “Skaljarskog klana”, Miliq Minja Shakoviq është vrarë të premten mbrëma në Budva.

Ai u likuidua në një kafene në Budva përballë mureve të qytetit të vjetër, raporton vijesti.

“Sonte janë përdorur armë zjarri në Budva, përballë mureve të qytetit të vjetër, gjatë së cilës ka mbetur i vrarë një person. Bëhet fjalë për M.S. Policia në bashkëpunim me prokurorinë kompetente janë duke ndërmarrë aktivitete për ndriçimin e ngjarjeve, për rrjedhën e të cilave opinioni do të njoftohet me kohë”, ka njoftuar drejtoria policore e Malit të Zi.

Një nga burimet ka thënë për vijesti se një burrë që ishte ulur në tavolinën pranë tij dhe i cili nuk ishte i maskuar, ka qëlluar disa herë drejt Shakoviqit.

Prokurorja e shtetit malaze, Ana Radoviq tha për TVCG se Shakoviq duket se është qëlluar nga një distancë e afërt.

“Gjatë hetimeve janë zbuluar disa gjurmë, nga disa vende dhe të gjitha do t’i nënshtrohen ekspertizës përkatëse. Kam urdhëruar edhe autopsinë e trupit”, ka thënë Radoviq.

Kujtojmë se emri i Miliq Shakoviqit është përmendur në mediat serbe në kuadër të hetimeve për vrasjen e liderit të tifozëve të “Partizanit”, Aleksandar Stankoviq, i njohur ndryshe si Sale Mutavi, në vitin 2016.

Përkundër kësaj, organet hetuese të Serbisë nuk e kanë ndjekur asnjëherë Sakoviqin në lidhje me atë krim.

Po ashtu, Shakoviq u plagos më 8 shtator të 2017 para lokalit “Auto Zeta” në Podgoricë, ku më pas u vra shoku i tij, Ivan Nedoviq.

Policia besonte se Nedoviqi ishte një viktimë aksidentale dhe se objektivi kryesor ishte Shakoviqi.

Në fillim të vitit të kaluar, policia arrestoi disa persona me pretendimin se ata kishin planifikuar vrasjen e Sakoviqit dhe se kjo e pengoi likuidimin e tij. /Telegrafi/