Vritet gazetari meksikan – i nënti me radhë vetëm për këtë vit

Luis Enrique Ramirez Ramos është gazetari i nëntë i vrarë në Meksikë në vitin 2022 – në atë që është dëshmuar të jetë një vit veçanërisht vdekjeprurës për punëtorët e medias në vend.

Sipas medieve të huaja, përcjell Telegrafi, trupi i Ramirez Ramos u gjet në një rrugë me baltë i mbështjellë me plastikë pranë një kantieri mbeturinash në kryeqytetin e Sinaloa-s të enjten.

Prokurorët thanë se ai vdiq nga goditjet e shumta në kokë.

“Ishte pa dyshim një vrasje”, tha Balbina Flores, një përfaqësuese e grupit të të drejtave të medias, Reporterë pa Kufij.

Sipas grupit, Ramirez është gazetari i nëntë i vrarë deri më tani këtë vit në Meksikë, duke e bërë vendin më të rrezikshëm për punonjësit e mediave jashtë zonave të luftës.

Motivi i vrasjes nuk dihet për momentin, por shteti Sinaloa është bastioni i kartelit Sinaloa të mbretit famëkeq të narkotikëve Joaquin “El Chapo” Guzman.

Gazetarët shpesh janë në cak në Meksikën provinciale për nxjerrjen në pah të karteleve të drogës dhe lidhjet e tyre me politikanët dhe policinë vendase. /Telegrafi/