Vidhet duhan në vlerë të 10 milionë eurove në Mal të Zi

Vlera e duhanit të vjedhur në Portin e Tivarit të Malit të Zi llogaritet në 10 milionë euro.

Për shkak të vjedhjes së cigareve nga Zona e Lirë, në Portin e Tivarit është arrestuar themeluesi dhe drejtori ekzekutiv i kompanisë “Peroçeviq”, Memo Peroçeviq dhe Dejan Dabanoviq, i punësuar në Drejtorinë e të hyrave dhe doganave, njoftoi policia malazeze.

Policia është njoftuar rreth orës 11:00 të ditës së sotme se është dëmtuar vula doganore e magazinës së kompanisë, “Montenegro duvan comerc”, e cila ndodhet në Zonën e Lirë të Portit të Tivarit, pas së cilës u konstatua se mungonin 11.349 pako të cigareve të llojeve të ndryshme, raporton rtcg.

Policia thekson se 8829 pakot e zhdukura janë objekt i procedurës penale nga Prokuroria Speciale e Shtetit malazez, ndërsa pakot tjera janë vendosur në depon e përmendur, transmeton Telegrafi.

Organet e drejtësisë shtojnë më tutje se po ndërmerren veprime të mëtejshme për zbardhjen e të gjitha rrethanave të kësaj ngjarje dhe identifikimin e të gjithë personave që kanë marrë pjesë në këto veprime të kundërligjshme.

Dyshohet se vula është vjedhur nga magazina në momentin kur Porti i Tivarit është evakuuar për shkak të denoncimit për bombë, e cila më pas rezultoi se ishte false. /Telegrafi/