Veseli bën thirrje që të ndihmohen fermerët

Kryetari i Partisë Demokratike të Kosovës, Kadri Veseli, ka bërë thirrje që sa më shpejt Qeveria e Kosovës të veprojë me pakon e rimëkëmbjes kombëtare, në mënyrë që punëtorëve të sektorit privat, ndërmarrësve, fermerëve t’iu dilet në ndihmë.

Veseli që sot ka qëndruar në Komunën e Drenasit, ka vizituar një fermer në këtë komunë, nga ku ka thënë se fermerët duhet të ndihmohen që të tejkalohet më lehtë sfida e pandemisë.

“Kjo është ajo që kam folur unë edhe për pakon e rimëkëmbjes kombëtare, në të cilën duhet të parashihet edhe nevoja për përkrahje direkte të këtyre njerëzve, fermerëve. Po flasim për fermë këtu, po flasim për bletë. Shumë gra dhe burra janë duke punuar në fusha produktet bujqësore, të cilëve këto ndalesa iu kanë krijuar probleme edhe për shitj en e produkteve. Të gjithë ata kanë nevojë për një adresim dhe për një zgjidhje dhe kjo është Qeveria e Kosovës duhet t‘iu ofrojë përkrahje të drejtpërdrejtë. Sa më shpejt të veprojmë pakon e rimëkëmbjes kombëtare, në mënyrë që 280 mijë punonjës të sektorit privat që 70 mijë ndërmarrësve privat, që gjithë këtyre fermerëve t’iu ndihmojmë, t’iu dalim në ndihmë, do ta kemi më lehtë edhe për tejkalimin e situatës së pandemisë, përveç aspektit shëndetësor më tepër po e ripërsërisim çdo ditë Kosova duhet të përgatitet për aspektin socio-ekonomik”, tha Veseli, përcjell KP.

Ndërkaq, fermeri nga fshati Vërboc i Drenasit Endrit Gralleva, tha se në këtë kohë iu duhet më shumë se kurrë ndihma nga shteti.

“Jam fermer i ri këtu, i kam 20 krerë lopë dhe 5 viça, do të thotë merrem me prodhimin e qumështit…I kam edhe 20 copa bletë…E vështirë është, mirëpo vullneti dhe ia dalim…Vizita është shumë e mirë dhe na jep përkrahje neve si fermer”, tha ai.

Kryetari i PDK-së Kadri Veseli, gjatë ditës ka vizituar edhe pyjet e djegura në Drenasi dhe xhaminë në fshatin Vërboc./Telegrafi/