Vendet e Ballkanit kërkojnë nga BE-ja 3 miliardë euro për kërkime dhe inovacion

Gjashtë vendet e Ballkanit Perëndimor kërkuan që të jepen 3 për qind të fondeve nga programi i Bashkimit Evropian “Horizon Europe”, me vlerë 100 miliardë euro, për rajonin, në mënyrë që të reduktohet boshllëku në fushën e inovacionit dhe kërkimit mes BE-së dhe Ballkanit Perëndimor.

“Ministrat e Arsimit dhe Shkencës së Ballkanit Perëndimor bënë një propozim në një deklaratë fillestare në kuadër të miratimit të programit për financim të kërkimit dhe inovacionit duke i qëndruar përfundimeve të arritura më 13 qershor në takimin në Bruksel të Grupit të Punës së Ballkanit Perëndimor për Kërkim dhe Zhvillim”, deklaroi Këshilli i Bashkëpunimit Rajonal.

“Pa prekur kriteret e shkëlqyera në seleksionimin e projekteve në ‘Horizon Europe’ ne kërkojmë investime për kërkimin dhe inovacionin të balancuara gjeografikisht në të gjithë Evropën, përfshirë edhe Ballkanin Perëndimor si një rajon përbërës. Për të ndihmuar në mbajtjen e premtimit të ‘Ndarjes së Ekselencës’, në kërkojmë që të jepet 3 për qind e këtij fondi në këtë drejtim”, thuhet në deklaratë.

Lexo po ashtu Lansohet fondi për përkrahjen e bizneseve që promovojnë inovacionin (Video)

Kujtojmë se Ministria e Inovacionit dhe Ndërmarrësisë, ka lansuar “Fondin për Inovacion dhe Ndërmarrësi” për bizneset ekzistuese dhe ato fillestare, të cilat kanë mundësinë të marrin subvencionim deri 100 mijë euro. /Telegrafi/