Ushtria në Mianmar bllokon qasjen në internet, qindra persona protestojnë për grusht-shtetin

Qindra njerëz janë mbledhur në qytetin kryesor të Mianmar, Yangon, për të protestuar kundër grusht-shtetit ushtarak që ndodhi në fillim të kësaj jave.

“Diktatura ushtarake, dështo, dështo; Demokraci, fito, fito”, brohoriti turma, derisa vlerësohet të jetë protesta më e madhe që kur ushtria mori pushtetin.

Sipas BBC, përcjell Telegrafi, protestuesit bënë thirrje për lirimin e udhëheqëses së zgjedhur Aung San Suu Kyi dhe të tjerëve të arrestuar nga ushtria.

Protesta erdhi pavarësisht përpjekjeve të ushtrisë për të pamundësuar mobilizimin e njerëzve duke mbyllur kështu mediet sociale.

Të premten në mbrëmje, Telenor, një nga ofruesit kryesorë të internetit në vend, konfirmoi se ishte urdhëruar të ndalonte qasjen e njerëzve në Twitter dhe në Instagram “deri në njoftimin e ardhshëm”.

Udhëheqësit e grusht-shtetit patën bllokuar edhe Facebook-un të enjten për hir të “stabilitetit”.

Dhe të shtunën, sipas BBC, raportet e pakonfirmuara njoftuan për një mbyllje totale të internetit. /Telegrafi/