Universiteti Teknik i Stambollit në Tiranë, Rama: Marrëveshja e shumëpritur

Kryeministri Edi Rama deklaroi sot se, Shqipëria dhe Turqia synojnë të arrijnë tavanin e dy miliardë eurove sa i përket nivelit të shkëmbimeve tregtare.

Në një deklaratë të përbashkët me Presidentin e Turqisë, Presidentin turk, Recep Tayyip Erdogan, Rama falënderoi presidentin turk për vizitën e tij sot në Shqipëri.

“Së pari dua të përsëris edhe njëherë për të disatën herë qysh kur Presidenti ka ngjitur shkallët e kësaj godine, falënderimet dhe shprehjen më të sinqertë të mirënjohjes për vizitën sot në Tiranë, së bashku me një pjesë të konsiderueshme të ekipit të tij qeveritar”, tha Rama.

“Jam vërtet shumë i kënaqur që zhvilluam takimin e dytë të Këshillit të Nivelit të Lartë të Bashkëpunimit, ku jo vetëm konfirmuam, vendosmërinë për ta forcuar më tej karakterin strategjik të këtij bashkëpunimi, por edhe mundëm të vlerësojmë zbatimin konkret të marrëveshjeve të bëra, si edhe potencialin e jashtëzakonshëm të kësaj marrëdhënieje”, theksoi Rama.

“Presidenti i Republikës së Turqisë e përsërit sa herë takohemi dhe me shumë të drejtë, që niveli i shkëmbimeve tregtare mes Turqisë dhe Shqipërisë nuk e pasqyron ashtu siç duhet potencialin mes dy vendeve dhe sikundër e dëgjuat dhe nga ai vetë, ambicia jonë është që sa më shpejt ne të arrijmë tavanin e 2 miliardë eurove, për të çelur pastaj një fazë të dytë me edhe më shumë zhvillim të këtyre shkëmbimeve”, shtoi Rama.

Rama gjithashtu shtoi se, numri i qytetarëve turq që kanë vizituar Shqipërinë gjatë 8 muajve të parë të këtij viti është rritur me 85%.

“Nga ana tjetër duke parë interesimin në rritje të përditshme të agjencive dhe të operatorëve turistikë të vendit mik, ne jemi besimplotë që vitin e ardhshëm numri i qytetarëve turq që do të vizitojnë Shqipërinë do të jetë ende më mbreslënës”, u shpreh Rama.

Në këtë aspekt, shtoi Rama, “Presidenti ritheksoi dhe patjetër që ramë plotësisht dakord, që duhet të bëhet më shumë për investime të drejtpërdrejta nga ana turke në sektorin e turizmit, ku e dimë të gjithë dhe falë në radhë të parë, zotërisë në krahun tim, Turqia ka bërë një transformim marramendës dhe është kthyer në një vend që, jo thjesht mikpret miliona e miliona turistë, por edhe ka një kapacitet të dijes në nivelin e ekselencës që për ne do të ishte shumë i vyer”.

Rama gjithashtu vlerësoi nënshkrimin e marrëveshjes për Universitetin Teknik të Stambollit në Tiranë.

“Sot ne firmosëm disa marrëveshje të gjitha të rëndësishëm, por më e rëndësishmja dhe më e mirëpritura dhe pak si e shumëpritura nga ana jonë ishte firmosja e marrëveshjes për Universitetin Teknik të Stambollit në Tiranë”, tha Rama.

Kreu i qeverisë theksoi se, “kjo është diçka shumë e rëndësishme në disa aspekte dhe patjetër që është diçka që do të sjellë një hapësirë të re studimesh të larta të nivelit të lartë botëror, pasi Universiteti teknik i Stambollit është i kuotuar në universitetet më të mira të botës, por edhe për një arsye tjetër, sepse është hera e parë në praktikën e Republikës së Turqisë që bën diçka të tillë dhe kjo thjesht dhe vetëm për përkushtimin e Presidentit Erdogan ndaj kësaj marrëdhënieje vëllazërore”.

Ndaj, shtoi Rama, dua ta falënderoj specifikisht për këtë marrëveshje të nënshkruar sot dhe uroj dhe dua të besoj që dhe në implementim njerëzit që do të merren me zbatimin e marrëveshjes do të kenë të paktën gjysmën e energjisë dhe të këmbënguljes së Presidentit se t’i kërkosh ta kenë të tërën është diçka që është jo realiste”. /Telegrafi/