UEFA e FIFA pyeten se a mund të luajnë Shaqiri e Xhaka për Kosovën

Të martën UEFA pritet ta pranojë Kosovën, gjë që do t’i hapë rrugë FIFA-s që ta bëjë të njëjtën gjë më 13 maj. Në këtë mënyrë, Kosova pritet të garojë në eliminatoret e Botërorit “Rusia 2018” në grup me Kroacinë, Islandën, Turqinë, Ukrainën dhe Finlandën, transmeton Zëri.

Por, gazeta më e madhe zvicerane, “Blick”, pyet se a mund të ndodh që dy yjet e Zvicrës, Xherdan Shaqiri e Granit Xhaka ta lënë ekipin helvetik për të luajtur për Kosovën.

UEFA i ka thënë gazetës zvicerane që këtë pyetje t’ia drejtojë FIFA-s. Kjo e fundit i ka thënë gazetës zvicerane se pasi ta merr ndonjë vendim UEFA për Kosovën, atëherë organet e FIFA-s do ndërmarrin hapat tjerë. Por, për çështje tjera, si për Shaqirin e Xhakën, FIFA nuk ka mundur të komentojë. “Ne nuk mund të flasim për çështje hipotetike”, ka thënë FIFA.

Por, më moti kësaj gazete një zyrtar i FIFA-s i pati thënë se gjasat janë të mëdha që Shaqiri e Xhaka të luajnë për Kosovën, nëse ata duan ta bëjnë këtë.

Por, gazeta helvetike shkruan se Shaqiri e Xhaka asnjëherë nuk e kanë përjashtuar mundësinë për të luajtur për Kosovën, duke kujtuar deklaratat e tyre: “Nëse Kosova bënë ekipin kombëtar, unë do ta shqyrtojë situatën”, transmeton Zëri. “Blick” kujton se Shaqiri e Xhaka gjithnjë me krenari tregojnë se janë shqiptarë nga Kosova. Kurse, për Vlon Behramin thekson se disa herë ka deklaruar se nuk do ta ndërrojë Zvicrën.

I kontaktuar nga “Blick”, gazetari nga Kosova, Kushtrim Krasniqi ua ka bërë me dije zviceranëve atë që e ka thënë selektori kosovar – se do t’i ftojë të gjithë futbollistët me rrënjë nga Kosova, ndërsa u mbetet atyre për të vendosur.