Kancelari gjerman bën thirrje për ‘plan të ri Marshall’ për Ukrainën

Kancelari gjerman Olaf Scholz ka bërë thirrje për një “Plan Marshall” të ri për të rindërtuar Ukrainën.

Duke folur në një konferencë të Berlinit për rindërtimin e Ukrainës të martën, Scholz tha se sulmet e vazhdueshme me dron të Rusisë përfaqësonin një pikë të re në luftën e saj kundër Ukrainës, por ishin gjithashtu një shenjë e dëshpërimit të Moskës.

Ai vazhdoi duke thënë se vetë historia e Gjermanisë tregoi se ishte e mundur të rindërtohej edhe pas një lufte shkatërruese, dhe kështu ishte e rëndësishme të planifikohej për të ardhmen e Ukrainës si një anëtare e begatë dhe demokratike e BE-së.

“Kjo konferencë ka të bëjë me krijimin e një Plani Marshall për shekullin e 21-të”, citohet të ketë thënë ai, përcjell Telegrafi.

Plani Marshall ishte një iniciativë e sponsorizuar nga SHBA që ndihmoi në ringjalljen e ekonomive të Evropës Perëndimore pas Luftës së Dytë Botërore.

Ndryshe, udhëheqësit kombëtarë, ekspertët e zhvillimit dhe CEO-t janë mbledhur në Berlin për një konferencë mbi atë që mikpritësit e saj e përshkruajnë si një “Plan Marshall” për të rindërtuar Ukrainën.

Sipas mediave të huaja, përcjell Telegrafi, konferenca është organizuar nga kancelari gjerman Olaf Scholz dhe Komisioni Evropian.

Vendimi i Vladimir Putin për të nisur një pushtim të plotë të Ukrainës në shkurt ka rezultuar në mijëra vdekje dhe shkatërrim të shtëpive dhe fabrikave.

Ndërsa lufta është dënuar si e paligjshme nga shumica në Perëndim, Moska ende e përshkruan atë si një “operacion special ushtarak” për të çliruar fqinjin e saj nga ekstremistët neo-nazistë.

“Forma e rindërtimit do të formësojë llojin e vendit që do të jetë Ukraina në të ardhmen”, kanë shkruar më herët Scholz dhe presidentja e Komisionit Ursula von der Leyen në edicionin e së hënës të gazetës gjermane Frankfurter Allgemeine.

“Një shtet i qeverisur nga ligji me institucione të forta? Një ekonomi e shkathët dhe moderne? Një demokraci e gjallë që i përket Evropës? Ndërsa duhet të jemi gjithmonë të kujdesshëm me krahasimet historike, ky nuk është më pak se një plan Marshall për shekullin e 21”, shkruan ata, duke e konsideruar rindërtimin e Ukrainës si një “detyrë brezash”.

Duke folur në një forum biznesi, Scholz shprehu dëshirat e Gjermanisë që Ukraina mund të bëhet një ditë anëtare e Bashkimit Evropian, një fakt që donatorët duhet ta marrin parasysh kur të përballen me shumat e mëdha që do të kushtonte rindërtimi.

“Lufta e Putinit ka bashkuar vendet tona”, kishte thënë ai në forum. /Telegrafi/