UBT në Prishtinë i jep Mirënjohje presidentit të Grupit Balfin, Samir Mane

Presidenti i Grupit BALFIN, Samir Mane ishte i ftuar i veçantë i Universitetit për Biznes dhe Teknologji (UBT) në një bashkëbisedim me studentët mbi rrugëtimin e tij nga student në sipërmarrës i suksesshëm.

Si vlerësim për rrugëtimin e tij 30 vjeçar në botën e sipërmarrjes universiteti UBT i dorëzoi Mirënjohje për kontributin e tij në ndërmarrësi, zhvillim ekonomik dhe përgjegjësi sociale në Shqipëri, Kosovë dhe më gjerë.

Rektori i Universitetit për Biznes dhe Teknologji, Prof. Dr. Edmond Hajrizi duke e falënderuar Samir Manen për pranimin e ftesës theksoi rëndësinë që ka bashkëpunimi midis universitetit dhe biznesit.

“E vlerësojmë shumë gjithçka që ju personalisht dhe grupi BALFIN ka bërë për zhvillimin ekonomik, për ngritjen e talenteve si edhe në fushën e filantropisë. Është kënaqësi për ne t’ju kemi në auditorët tona për të na rrëfyer modelin tuaj të suksesit ashtu siç mirëpresim bashkëpunimin më të ngushtë jo vetëm mes grupit BALFIN dhe UBT, por edhe të kontribuojmë bashkërisht në bashkëpunimin mes Shqipërisë dhe Kosovës përmes të rinjve të shkëlqyer”, shtoi ai.

I pyetur nga studentët për fillimet e tij, Samir Mane tregoi rrugëtimin e tij si sipërmarrës nga një student i ri i cili braktisi studimet për të emigruar në Austri deri më sot ku Grupi BALFIN, i krijuar prej tij, është i pranishëm në 10 vende të ndryshme. “

“Unë nuk studiova dot për atë që doja, ekonomi dhe biznes, por sot bëj atë që gjithnjë dëshiroja dhe akoma dua. U diplomova për inxhinieri dhe miniera por sot jam sipërmarrës sepse këtë kërkoja dhe për këtë punova. Nuk mjafton vetëm të jesh në vendin e duhur dhe në momentin e duhur, por kërkohet edhe shumë punë për të arritur atë që do”, u tregoi ai studentëve të UBT.

Lidhur me interesimin e studentëve për mendimin e tij rreth Inteligjencës Artificiale, Mane theksoi se “për mua AI do të ndryshojë botën për mirë. Nëse do të dimë ta përdorim siç duhet në të mirën tonë, Inteligjenca Artificiale do të na mundësojë të jemi më efikas në punën tonë”.

Interesimit të studentëve për lidhjet ekonomike midis Shqipërisë dhe Kosovës, Samir Mane u përgjigj: “Marrëdhëniet ekonomike kanë mbetur prapa në krahasim me këmbimet kulturore. Sot tregu i artit midis dy vendeve është njehsuar thuajse krejtësisht, ndërkohë që ka akoma barriera artificiale për këmbimin ekonomik. Duhet që shtetet të ndërtojnë politika që të mbështesin këmbimin ekonomik sepse vetëm kështu mund të konsiderohemi një treg me interes për investitorët e huaj”.

“Secilit prej jush do t’i këshilloja të merrej me sipërmarrje…Ne mund të punojmë bashkërisht për të dhënë shpresën për të rinjtë, të punojnë në Shqipëri e Kosovë e bashkë të krijojmë kushtet për të ardhmen që të gjithë duam”, u tha Mane studentëve.

Ky është takimi i i dytë i presidentit të Grupit BALFIN, Samir Mane me studentët e Prishtinës.

Pak muaj më parë ai ka qenë në auditor me studentët e Fakultetit të Inxhinierisë Elektrike dhe Kompjuterike të Universitetit publik të Prishtinës, duke u përgjigjur interesimit të tyre.

Grupi BALFIN është i pranishëm në Kosovë me kompanitë Neptun Jumbo dhe Balfin Real Estate ku përveç aktiviteti ekonomik ka një kontribut të rëndësishëm edhe në projekte me impakt social.

Nëpërmjet Fondacionit Mane deri më sot janë realizuar një sërë projektesh si ngritja e laboratorit në Fakultetin e Inxhinierisë Elektrike dhe Kompjuterike në Universitetin e Prishtinës, pajisja me monitorë e pavijonit të Kirurgjisë në Klinikën Universitare të Prishtinës.

Fondacioni Mane, së bashku me Neptun e Jumbo Kosova ndihmuan fëmijët në Fshatin SOS Prishtinë, si edhe realizuan rikonstruksionin e një kopshti fëmijësh në Fushë Kosovë, një tjetër në Mitrovicë, një park publik në Gjilan. Po ashtu, u ndihmuan 10 familje, të cilat kishin pësuar dëme nga përmbytjet e shiut në Pejë.