Trupat e Koresë së Veriut po vriten duke luftuar kundër Ukrainës, konfirmon SHBA

Trupat e Koresë së Veriut janë vrarë duke luftuar me forcat ukrainase në rajonin kufitar Kursk të Rusisë, ka deklaruar SHBA.

Këto janë viktimat e para të raportuara që kur u zbulua në tetor se Koreja e Veriut kishte dërguar rreth 10,000 trupa për të përforcuar përpjekjet luftarake të Rusisë.

Agjencia e inteligjencës ushtarake e Ukrainës, GUR, tha se të paktën 30 trupa të Koresë së Veriut ishin vrarë ose plagosur në luftimet gjatë fundjavës.

Bëhet e ditur se trupat e Koresë së Veriut – të cilët nuk kanë përvojë të mëparshme luftarake – besohet se i kanë kaluar javët e para në stërvitje në Rusi dhe më pas në role mbështetëse, shkruan BBC, përcjell Telegrafi.

Ndërsa të shtunën, presidenti ukrainas Volodymyr Zelensky tha se rusët kishin filluar të përdorin një “numër të rëndësishëm” të koreano-veriorëve në sulmet e saj në Kursk.

Lexo po ashtu Ukrainasit thonë se trupat e Koresë së Veriut pësuan humbje të mëdha në Kursk, duhej të dërgoheshin tjerë për ta plotësuar boshllëkun

Sekretari i shtypit i Pentagonit, gjeneralmajor Pat Ryder tha se SHBA beson se ushtarët e Koresë së Veriut ishin “angazhuar në luftime në Kursk së bashku me forcat ruse” dhe “pësuan viktima, të vrarë dhe të plagosur” – pa dhënë numra specifikë.

Ai shtoi se dukej se koreano-veriorët po përdoreshin në rolet e këmbësorisë dhe se përfshirja e tyre deri më tani mendohej të ishte e kufizuar në Kursk.

GUR deklaroi se viktimat e Koresë së Veriut ishin në fshatrat Plekhovo, Vorobzha dhe Martynovka.

“Forcat e mbrojtjes dhe inteligjenca e Ukrainës po punojnë për të përcaktuar shkallën e plotë të humbjeve aktuale të pësuar nga njësitë ruse që përfshijnë koreano-veriorë”, tha Zelensky.

Ai shtoi se nuk kishte “asnjë arsye të vetme që koreano-veriorët të vdisnin në këtë luftë”. /Telegrafi/