Presidenti Donald Trump shkroi në rrjetet sociale të enjten se i ka dhënë Koresë së Jugut miratimin për të ndërtuar një nëndetëse me energji bërthamore.
Dhe kjo, siç ka bërë të ditur presidenti amerikan, do të zhvillohet në Shtetet e Bashkuara, përcjell Telegrafi.
Në komentet e bëra gjatë udhëtimit të tij në Azi, Trump, i cili është takuar me Presidentin e Koresë së Jugut Lee Jae Myung dhe udhëheqës të tjerë rajonalë gjatë vizitës së tij, tha gjithashtu se Seuli kishte rënë dakord të blinte sasi të mëdha nafte dhe gazi amerikan.
Lee gjithashtu kishte kërkuar lejen e SHBA-së që Koreja e Jugut të ripërpunonte karburantin bërthamor për të furnizuar me energji nëndetëset që mund të gjurmonin anijet e Koresë së Veriut dhe Kinës për periudha më të gjata.
Seuli është i ndaluar të bëjë një gjë e tillë pa pëlqimin e SHBA-së, sipas një pakti midis vendeve.
"Unë u kam dhënë atyre miratimin për të ndërtuar një nëndetëse me energji bërthamore, në vend të nëndetëseve të vjetra dhe shumë më pak të shkathëta me naftë që kanë tani", shkroi Trump në platformën e tij Truth Social të enjten.
Trump bëri të ditur se nëndetësja do të ndërtohet në Filadelfia. /Telegrafi/
