Transparenca e prokurimit në Qeveri, pa progres

Instituti Demokratik i Kosovës shpalosi indeksin vjetor të transparencës në prokurim publik për Ministritë dhe Zyrën e Kryeministrit.
Artan Canhasi nga KDI-ja tha se sa i përket transparencës së prokurimit publik nuk ka rritje.

“Nuk vërehet një trend pozitiv i rritjes së transparencës së dokumenteve të publikuara nga Kabineti Qeveritar që kanë të bëjnë më prokurimin publik. Shpresojmë që prokurimi elektronik do të ndryshojë këtë gjendje”, theksoi Canhasi,

Ndërsa, Burim Ejupi nga INDEP-i ka kritikuar institucionet s ai përket transparencës rreth kontratës për ndërtimin e autostradës. “Transparenca qeveritare është e lartë për çështje të vogla; kurse, ajo mungon kur është fjala për kontrata madhore sikurse ajo e autostradës apo termocentralit”, tha Ejupi.

Ministria e Drejtësisë prin si më transparentja sa i përket transparencës buxhetore, duke ofruar raporte javore të shpenzimeve. Kurse Ministria e Financave prin sa i përket publikimit të njoftimeve për kontratë. KDI-ja rekomandon që ministritë tjera të ndjekin shembullin e këtyre të fundit.

Me një buxhet shteti përgjithësisht të pamjaftueshëm, efikasiteti dhe transparenca në shpenzimin e secilit cent të parasë publike dhe kthimi i saj në të mirë publike është e domosdoshme.

Indeksi i Transparencës është produkt matës përmes së cilit KDI synon të bëjë përgjegjëse dikasterët qeveritarë për transparencë në shpenzimin e parasë publike dhe të matë progresin në këtë fushë nga viti në vit. /Telegrafi/