Trajneri i Turqisë, Gunes: Kujdes nga Shqipëria, janë përmirësuar shumë

Senol Gunes paralajmëroi lojtarët e tij të kenë kujdes nga Shqipëria dhe të mos mendojnë aspak për ndeshjen ndaj Francës.

Në një konferencë për shtyp numri 1 i stolit të Turqisë foli me superlativa për kuqezinjtë e Rejas të cilët sipas tij kanë ndryshuar shumë krahasuar me ndeshjen e parë të zhvilluar mes dy skuadrave në Shkodër në muajin mars.

“Të dyja ndeshjet janë të rëndësishme. Kemi luajtur 6 ndeshje e mbeten edhe 4. Sa më pak zvogëlohet numri i ndeshjeve, aq më shumë rritet rëndësia e tyre. Do luajmë me Francën, një nga favoritet e grupit”.

“Por më parë do të luajmë me Shqipërinë dhe mund të them se është ndeshja jonë më e rëndësishme. Nëse e fitojmë këtë ndeshje, atëherë do të luajmë finalen me Francën. Mos dashtë Zoti të gabojmë, do të rivlerësojmë situatën për dy ndeshjet e fundit”.

“Por nëse mundim Shqipërinë dhe Islandën, shkojmë direkt në Europian. Me Francën është e rëndësishme por edhe kjo me Shqipërinë është shumë. Pasi mundën Islandën, ata do të hyjnë në fushën e lojës me qëllimin për të na mundur”.

“Shqipëria është një skuadër me lojtarë të mirë dhe shumë  prej tyre luajnë në kampionatin italian. Trajneri i tyre është i njohur në Itali, është me eksperiencë. Ata kalojnë nga 3-5-2 në 5-3-2”.

“Janë një ekip rezistent dhe luftarak, një skuadër që luan kompakte edhe në fazën ofensive. Nëse keni një mendim negativ për Shqipërinë, duhet ta harroni. Ne duhet të jemi një ekip agresiv duke vrapuar po aq shumë sa ata”, ka thënë Gunes./SS/