Trajneri i kombëtares, Inzaghit i ofrohen 480 mijë euro në vit

Armand Duka e ka zgjedhur pasuesin e Gianni de Biasit. Presidenti i Federatës Shqiptare të Futbollit ka vendosur sytë dhe është gati të vendosë edhe portofolin mbi Filipo Inzaghin.

Me sa mësohet oferta që i është parashtruar në një komunikim telefonik ish-trajnerit të Milanit është 480 mijë euro në vit, një shifër vërtet e konsiderueshme po të llogaritet që bëhet fjalë për një institucion që drejton futbollin në një vend të vogël dhe me probleme ekonomike, transmeton ata.

Me sa referojnë mediat në Itali, çështja financiare nuk është kryesore për teknikun aktual të Venezias, i cili normalisht është mjaft i tërhequr nga një përvojë në stolin e një skuadre përfaqësuese që është në rritje, por në krahun tjetër nuk kërkon të braktisë një projekt ku ai vetë ishte në epiqendër të gjithçkaje duke e ngjitur Venezian nga Lega Pro në Serinë B.

Kontaktet mes Dukës dhe përfaqësuesit të “Superpippos” Tullio Tinti janë të vazhdueshme. Një pikë ku palët duhet gjithashtu të bien dakord është ajo e stafit, pasi Inzaghi nëse nënshkruan do të marrë me vete 8 bashkëpuntorë, të njëjtët që aktualisht ka tek klubi venezian.

Pritet që brenda pak ditësh 44 vjeçari ti kthej presidentit të FSHF-së një përgjigje përfundimtare. Ndërkohë alternativat nuk mungojnë nga Roberto Carlos, Delio Rosi e deri tek Sami Hyypia.