Tottenhami në gjysmëfinale pas një ndeshjeje të çmendur dhe dramatike ndaj Cityt në Etihad

Manchester City dhe Tottenhami na dhuruan një ndeshje të çmendur në çerekfinalen e dytë në Ligën e Kampionëve, ndeshja përfundoi me rezultat 4-3 për Cityn.

Por, pasi ndeshja e parë kishte përfunduar me rezultat 1-0 në të mirë të Spurs, skuadra e Mauricio Pochettino vazhdoi tutje fal golave të shënuar si mysafir.

Goli i parë në takim erdhi nga Raheem Sterling (4′), ndërsa Heung-Min Son barazoi rezultatin në minutën e shtatë dhe pastaj kaloi Spurs në epërsi në minutën e 10-të.

City riktheu epërsinë në minutën e 11-të me anë të Bernardo Silvas, ndërsa Sterling kaloi edhe një herë Cityn në epërsi në minutën e 21-të dhe me rezultatin 3-2 përfundoi pjesa e parë.

Skuadra e Pep Guardiolas e filloi edhe mirë pjesën e dytë, ishte Sergio Aguero që thelloi epërsinë në minutën 59-të.

Por, ky gol i argjentinasit në fund doli të jetë i pavlefshëm pasi Fernado Llorente shënoi në minutën e 73-të dhe i dha kualifikim skuadrës së tij në gjysmëfinale. Vlen të theksohet se Man City iu anulua një gol nga VAR-i në minutat e fundit të ndeshjes për pozitë jashtë lojë.

Në gjysmëfinale Spurs do të luajnë kundër Ajaxit që eliminoi Juventusin. /Telegrafi/