Tifozët detyrohen të zgjedhin kë të shikojnë, Shqipërinë ose Kosovën!

Shumica e ndeshjeve të Shqipërisë dhe Kosovës në kualifikime për ‘Rusia 2018’ do të zhvillohen në të njëjtin orar.

Në natën e të hënës, shumë tifozë dëshironin të ndiqnin si kombëtaren shqiptare të futbollit në ndeshjen e saj ndaj Maqedonisë, ashtu edhe përfaqësuesen e Kosovës në debutimin historik ndaj Finlandës.

Mirëpo, kalendari i caktuar nga UEFA për ndeshjet e para nuk u ka lejuar t’i shohin njëkohësisht me qetësi të dy ndeshjet, pasi janë luajtur në të njëjtin orar. Fatkeqësisht, situata do të përsëritet edhe në vazhdim.

Sipas kalendarit të përcaktuar nga UEFA për ndeshjet e Grupeve G dhe I ku bëjnë pjesë përkatësisht Shqipëria dhe Kosova, dy skuadrat do të jenë gjithmonë në fushë në të njëjtën ditë dhe thuajse gjithmonë në të njëjtin orar, shkruan Panorama Sport.

Përjashtimet janë datat 9 tetor 2016, (Ukrainë-Kosovë ora 18:00, Shqipëri-Spanjë ora 20:45), 24 mars 2017 (Itali-Shqipëri ora 20:45, Kosovë-Islandë ora 18:00) dhe 2 shtator 2017 (Shqipëri-Lihtenshtajn ora 18:00, Kroaci-Kosovë ora 20:45).

Në të gjitha ndeshjet e tjera, tifozët duhet të zgjedhin se kë të shohin, ose të provojnë të bëjnë atë që ndodhi në Prishtinë, ku në sheshin qendror të qytetit, në natën e të hënës, u vendosën dy ekrane gjigante që transmetonin njëkohësisht të dyja ndeshjet.

Kalendari i të dy skuadrave

06.10.2016
Lihtenshtajn-Shqipëri 20:45
Kosovë-Kroaci 20:45

09.10.2016
Ukrainë-Kosovë 18:00
Shqipëri-Spanjë 20:45

12.11.2016
Shqipëri-Izrael 20:45
Turqi-Kosovë 20:45

24.03.2017
Itali-Shqipëri 20:45
Kosovë-Islandë 18:00

11.06.2017
Izrael-Shqipëri 20:45
Kosovë-Turqi 20:45

02.09.2017
Shqipëri-Lihtenshtajn 18:00
Kroaci-Kosovë 20:45

05.09.2017
Maqedoni-Shqipëri 20:45
Kosovë-Finlandë 20:45

06.10.2017
Spanjë-Shqipëri 20:45
Kosovë-Ukrainë 20:45

09.10.2017
Shqipëri-Itali 20:45
Islandë-Kosovë 20:45