Threads mbi 100 milionë përdorues: Por, sa po e përdorin vërtet aplikacionin?

Ka kaluar një javë që kur Meta prezantoi aplikacionin e ri Threads.

Tashmë në ditën e parë, Threads regjistroi një rekord prej 70 milionë regjistrimesh përdoruesish, ndërsa pas pesë ditësh ishin më shumë se 100 milionë. Shtatë ditë pas prezantimit, aplikacioni ka mbi 109 milionë përdorues të regjistruar, siç vlerësohet nga QuiverQuant.

Nëse rritja vazhdon me këtë ritëm, numri i regjistrimeve të përdoruesve mund të kalojë 200 milionë para fundit të javës së ardhshme.

Megjithatë, në vazhdën e këtij suksesi të madh, mbetet e paqartë se sa përdorues të Threads janë vazhdimisht aktivë në platformë. Meta nuk mund ta konfirmonte këtë informacion.

Kjo ngre pyetjen nëse Threads është me të vërtetë “vrasësi” i Twitterit që shumë e përshkruajnë atë, apo nëse ky sukses është jetëshkurtër.

Lexo po ashtu Threads theu edhe rekordin e ChatGPT-s

Disa përdorues janë vërejtur të largohen nga platforma dhe të kthehen në Twitter menjëherë pasi kanë krijuar një llogari në Threads. Kjo krijoi një problem për ta – ata nuk mund të mbyllin llogaritë e tyre të reja Threads nëse nuk janë të gatshëm të sakrifikojnë profilet e tyre në Instagram në të njëjtën kohë.

Arsyeja është se dy platformat janë të ndërthurura – një profil ekzistues në Instagram përdoret për të krijuar një llogari Threads dhe Meta nuk ka zhvilluar ende një metodë për t’i ndarë ato.

Threads është aplikacioni më i shpejtë për të arritur 100 milionë përdoruesit e parë. Kështu, Twitterit iu deshën pesë vjet për këtë arritje, Facebookut katër vjet e gjysmë dhe WhatsAppit tre vjet.

Instagram arriti 100 milionë përdoruesit e parë pas dy vitesh e gjysmë prezantimit, ndërsa ChatGPT arriti ta bëjë këtë pas dy muajsh.

Ndryshe, portalin Telegrafi mund ta ndiqni edhe përmes aplikacioni të ri ‘Threads’ – për momentin përmes dy profileve zyrtare, Telegrafi.com, si dhe Telegrafi Sport. /Telegrafi/