Thaçi për udhëheqjen e dialogut: Do të ndihem mirë pranë kryeministrit Hoti

Presidenti i vendit, Hashim Thaçi në një konferencë për media tha se në dialogun Kosovë-Serbi do të flasin me një zë.

I pyetur se kush do të jetë pjesë e ekipit që do të udhëtoj për Washington dhe kush do të udhëheq me këtë proces, Thaçi u shpreh fillimisht se përgjegjësitë janë shumë të qarta në përputhshmëri me Kushtetutën.

“Ne do flasim me një zë do të respektojmë vullnetin e qytetarëve do të kemi koordinim ndërinstitucional. Kosova ka bartësit e institucioneve të shtetit përfaqësuesit legjitim dhe legal. Përgjegjësitë janë shumë të qarta në përputhshmëri me Kushtetutën e Kosovës, do të punojmë që kemi koordinim të ngushtë, në fund te fundit ne shkojmë si Kosovë përball Serbisë”, tha Thaçi.

Ai tha se do të ndihet mirë që të jetë pranë kryeministrit Avdullah Hoti.

“Për të hequr dilemat e juaja por edhe të opinionit unë do të ndihem mirë që të jem më edhe pranë kryeministrit Hoti, nuk ka dilema në këtë drejtim”, tha Thaçi.

Presidenti theksoi se Bashkimi Evropian në këtë proces po hynë me një hendikep të madh atë të mos liberalizimit të vizave, duke shtuar se pavarësisht kësaj dhe deklaratave skeptike lidhur me takimin në Washington, e ardhmja e Kosovës do të jetë evropiane.

Thaçi përmendi edhe Samitin e Parisit që sipas tij pritet të mbahet në javën e tretë të korrikut, ku tha se do të  punojnë ngushtë që të kenë sukses edhe në këtë takim, ku theksoi se beson që edhe diplomati sllovak Miroslav Lajçak do të jetë atje. /Telegrafi/