Tërnava për mobilizimin e ushtrisë nga Vuçiqi: Kërcënimi vetëm për të bindur popullin serb

Zbatimi i vendimit të Qeverisë së Kosovës lidhur me targat e automjeteve që nuk janë konvertuar parasheh vërejtje e më vonë edhe gjoba për ata që nuk e zbatojnë kërkesën. Njohësi i sigurisë Hajrullah Tërnava nuk parasheh ndonjë mundësi për përshkallëzim të situatës në veri të Mitrovicës.

Vendimi i Qeverisë së Kosovës lidhur me targat e automjeteve që nuk janë konvertuar nga ato ilegale në ato RKS, tashmë ka hyrë në fuqi.

Zbatimi i këtij vendimi do të bëhet në tri faza, që fillimisht parashihen vërejtjet, ndërsa pas tri javëve edhe gjoba për ata që nuk e zbatojnë kërkesën.

I ftuar në RTV Dukagjini, lidhur me gjobat me dhënien e të cilave do mund të shkaktohej një “cenim potencial i sigurisë”, Tërnava ka thënë se nuk beson që të njëjtat të ndodhin.

“Unë mendoj se s’mund të ketë cenim të sigurisë. Është një lloj lufte speciale dhe mendoj se kryeministri Kurti, jam i bindur se nuk e ka marrë këtë vendim krye në vete pa u konsultuar me të tjerët. Gjuhën diplomatike është e vështirë t’a kuptoj qytetari i rëndomtë, e kuptojnë ata që janë drejtë për drejtë në bisedimet diplomatike me ata që u japin urdhra apo janë kompentent të flasin me kryeministrin tonë”, ka deklaruar ai.

Ministri i Mbrojtjes i Serbisë, Millosh Vuçeviq, ka thënë se me urdhër të presidentit Aleksandër Vuçiq, ushtria e Serbisë është ngritur në “nivel gatishmërie” për shkak të situatës në Kosovë.

Lidhur me deklaratën, Tërnava ka thënë se qëndrimi i Serbisë përball Kosovës ka qenë gjithmonë konfliktuoz dhe si i tillë, është Vuçiq ai i cili dëshiron të tregojë qëndrimin e tij nacionalist popullit serb.

Sipas tij, ky kërcënim do të bindë popullin serb se ai qëndron prapa këtyre fjalëve dhe populli serb mos të ka ndonjë frikë sepse ka prapa vete shtetin e Serbisë.

“Serbia luan lojëra por kurrsesi nuk mund të vie deri në konfliktin luftarak, e di se sigurinë e Kosovës e ruan KFOR-i, që është pjesë e NATO-së”, ka deklaruar Tërnava.

Krahas kësaj, Tërnava ka thënë se shteti serb është i vetmi përkrahës i Rusisë në luftën kundrejt Ukrainës.