Ronaldo luajti për herë të parë nën Erik ten Hag te Manchester United të dielën e kaluar. Ylli 37-vjeçar ka munguar në seancat e para stërvitore të përgatitjes për sezonin e ri dhe gjithashtu nuk ka shkuar në Azi dhe Australi për shkak të rrethanave familjare.
Portugezi dëshiron të largohet nga Mançesteri sepse dëshiron të luajë në Ligën e Kampionëve. Klubi anglez luan në Ligën e Evropës. Edhe pse trajneri shpesh e bën të qartë se sulmuesi i tij nuk është në shitje, situata është ndryshe nga njëri ndër lojtarët më të mirë në histori të futbollit.
Kështu, Ronaldo luajti për United për herë të parë fundjavën e kaluar. Edhe pse Ten Hag tha se ka ende disa gjëra për t’i bërë.
Pesë herë fituesi i Topit të Artë luajti 45 minuta kundër Rayo Vallecanos. Ai vendosi të mos priste përfundimin e ndeshjes, duke u larguar gjatë pjesës së dytë.
Ten Hag tha për këtë sjellje në Viaplay: “Unë sigurisht që nuk e fal këtë. Kjo është e papranueshme. Për të gjithë".
Ai e kishte fjalën për disa lojtarë që u larguan herët nga stadiumi, më specifikisht për Ronaldon që duket se e do me ngulm largimin nga Unitedi.
Ten Hag do të nisë sezonin e ri të dielën më 7 gusht, kur Unitedi takohet me Brightonin në “Old Trafford”. /Telegrafi/
