Telekomi tregon arsyet për pengesat në komunikim me operatorin Vala

Telekomi i Kosovës ka bërë me dije se janë shfaqur disa probleme në sistemin operativ të telefonisë mobile Vala.

Sipas njoftimit të kësaj kompanie, ekipet teknike janë duke bërë përpjekje që të eliminojnë të gjitha problemet e shfaqura sa më shpejt që të jetë e mundur.

Njoftimi i plotë

Për shkak të disa problemeve teknike të shfaqura në sistemin operativ të VALA-së gjatë ditës së sotme, janë evidentuar kohë pas kohe pengesa në komunikim dhe si pasojë komunikimi nuk ka qenë i mundur në disa shërbime në rrjetin mobil të VALA-së në disa zona të caktuara.

Ekipet teknike janë duke bërë përpjekje maksimale që të eliminojnë të gjitha problemet e shfaqura sa më shpejt që të jetë e mundur në mënyrë që ta rikthejnë funksionimin normal të gjitha gjithë shërbimeve si në gjendjen e mëparshme, për të siguruar komunikim të pandërprerë për të gjithë konsumatorët tanë.

Edhe një herë Telekomi i Kosovës u kërkon falje dhe mirëkuptim të gjithë konsumatorëve, të cilët mund të kenë vështirësi eventuale në komunikim! /Telegrafi/