Tahiri i përgjigjet Vulinit: S’ka ndarje të Kosovës, Serbia duhet ta pranojë realitetin

Koordinatori nacional për Reforma Shtetërore, Besnik Tahiri i është kundërpërgjigjur ministrit serb të Mbrojtjes, Aleksandar Vulin, duke thënë se nuk ka ndarje të Kosovës dhe se Serbia duhet të pranojë sa më parë një realitet të tillë.

Ai në një postim në Facebook shkruan se Vulin dhe zyrtarët tjerë të Beogradit duhet ta kuptojë se koha e ‘kompromisit’ ka kaluar dhe tash është koha e pranimit të realitetit.

“E çka është realiteti: Kosova është e njohur nga mbi 100 shtete të botës dhe tash e 19 vjet kur e kemi fituar lirinë e 10 vite nga shpallja e pavarësisë i tërë sistemi politik dhe rregullimi institucional i shtetit është i pavarur”, shkruan Tahiri.

Ai përkujton tri parimet kryesore të Grupi i Kontaktit sipas të cilave  zgjidhja e statusit të Kosovës duhet të konsolidojë sigurinë dhe stabilitetin rajonal, në mënyrë që Kosova të mos kthehet në gjendjen e para marsit të vitit 1999.

Po ashtu sipas parimeve të Grupit të Kontaktit nuk do të ketë ndryshime të territorit të tanishëm të Kosovës, që do të thotë nuk do të ketë ndarje të Kosovës dhe bashkim i Kosovës me ndonjë shtet tjetër apo me ndonjë pjesë të ndonjë shteti tjetër.

“Çfarëdo tendence për të rikthyer në diskursin publik fjalë ‘kompromis’ është huqje dhe intencë për të prodhuar mjegull politike. Në fakt këtë fjalë, Beogradi zyrtar po e përdorë më shumë për të qetësuar gjakrat brenda, e jo që e dinë apo që shpresojnë ne një ‘kompromis’ të madh e të ri me Kosovën”, shkruan Tahiri.

Ndryshe, ministri serb i Mbrojtjes, Aleksandar Vulin, është shprehur pesimist sa i përket arritjes një kompromisi të mundshëm ndërmjet Kosovës dhe Serbisë në dialogun në Bruksel.

Ai ka thënë se nuk është i mundur kompromisi për të cilin Prishtina flet dhe se çdo gjë e bëjnë me idenë e “ruajtjes së interesave shtetërore kombëtare në territorin e Kosovës./Telegrafi