Superliga e Kosovës vjen me tri ndeshje interesante – Llapi pret Prishtinën në derbin e javës, Feronikeli udhëton te KEK-u

Sot (e shtunë) janë në program për t’u zhvilluar edhe tri ndeshje tjera të javës së 20-të në Ipko Superligën e Kosovës në futboll.

Gjatë ditës së premte u zhvilluan tri ndeshjet e para në Superligën e Kosovës, ku u arritën dy fitore nga vendasit dhe një barazim.

Drita mposhti Drenicën me rezultat 2-0, Ferizaj triumfoi minimalisht ndaj Ballkanit 1-0, ndërsa Liria dhe Gjilani ndanë pikët me barazim 1-1.

Lexo po ashtu Të gjitha lajmet rreth Superligës së Kosovës

Megjithatë, sot pritet të jenë tri ndeshje edhe më interesantë në orar, ku spikat edhe derbi rajonal Llapi-Prishtina.

Fituesi në fuqi i Kupës së Kosovës, Prishtina udhëton drejt Podujevës për ndeshjen ndaj Llapit, e cila vlen më shumë se tri pikë për të dyja klubet për të mbetur në garë për titull në hap me Feronikelin.

Lideri Feronikeli mendohet të ketë punë më të lehtë në këtë javë pasi udhëton drejt Obiliqit për ndeshjen ndaj vendit të fundit në tabelë, KEK-ut.

Takim interesant pritet të zhvillohet edhe në stadiumin “Fadil Vokrri”, ku Flamurtari në formë pret Trepçën ’89.

Dy ndeshjet e para pritet të fillojnë nga ora 13:30, ndërsa takimi mes Flamurtarit e Trepçës ’89 është rezervuar nga ora 17:00. /Telegrafi/