Sulmet izraelite në Gazë vrasin 61 persona në 48 orë ndërsa OKB-ja vazhdon vaksinimet e fëmijëve palestinezë kundër poliomielitit

Sulmet ushtarake izraelite në të gjithë Gazën vranë të paktën 61 persona në 48 orë, kanë njoftuar mjekët lokalë, ndërsa forcat izraelite luftonin me militantët e udhëhequr nga Hamasi.

Njëmbëdhjetë muaj pas luftës, raunde të shumta të diplomacisë deri më tani nuk kanë arritur në një marrëveshje armëpushimi për t’i dhënë fund konfliktit dhe për të sjellë lirimin e pengjeve izraelitë dhe të huaj të mbajtur në Gazë, si dhe shumë palestinezë të burgosur në Izrael.

Bëhet e ditur se një sulm ajror izraelit në kompleksin e shkollës Halima al-Sa’diyya që shërben si strehë për njerëzit e zhvendosur në kampin urban të refugjatëve Jabalia vrau të paktën tetë persona dhe plagosi 15 të tjerë.

Ushtria izraelite tha se sulmi kishte shënjestruar një qendër komanduese të Hamasit brenda kompleksit.

Ajo akuzoi grupin militant islamik për shfrytëzim të vazhdueshëm të civilëve dhe infrastrukturës civile për qëllime ushtarake, një akuzë që Hamasi e mohon.

Ndërsa pesë persona të tjerë u vranë në një sulm në një shtëpi në qytetin e Gazës, shkruan Reuters, përcjell Telegrafi.

Më vonë të shtunën, një sulm izraelit vrau katër persona dhe plagosi 25 të tjerë në shkollën Amr Ibn Ala’as, e cila strehon gjithashtu familje të zhvendosura në periferi të Sheikh Radwan të qytetit të Gazës.

Ushtria izraelite tha se sulmi ajror kishte në shënjestër një qendër komandimi të operuar nga njerëz të armatosur të Hamasit në kompleksin që më parë kishte shërbyer si shkollë.

Zyrtarët palestinezë shëndetësorë thanë se sulmet ushtarake izraelite kishin vrarë deri më tani 28 njerëz në të gjithë Rripin e Gazës të shtunën.

Dy palët ndërluftuese vazhduan të fajësojnë njëra-tjetrën për dështimin e ndërmjetësve, përfshirë Katarin, Egjiptin dhe Shtetet e Bashkuara, për të ndërmjetësuar një armëpushim.

SHBA po përgatitet të paraqesë një propozim të ri, por perspektivat e një përparimi duken të zbehta pasi boshllëqet midis palëve mbeten të mëdha.

Drejtori i CIA-s, William Burns, kryenegociatori i SHBA-së, tha në një ngjarje në Londër se një propozim më i detajuar do të bëhej në ditët në vijim.

Pavarësisht bllokimit, Kombet e Bashkuara, në bashkëpunim me autoritetet lokale shëndetësore, kanë ndjekur një fushatë për të vaksinuar 640,000 fëmijë në Gazë pas rastit të parë të poliomielitit në rreth 25 vjet.

Një raund i dytë i vaksinimit do të kërkohet katër javë pas vaksinimit të parë. /Telegrafi/