Sugareski: Ndërprerja e linjës hekurudhore Beograd – Selanik është për shkak mospasjes së leverdisë ekonomike

Ndërprerja e linjës hekurudhore ndërkombëtare Beograd – Selanik është bërë për shkak të mospasjes së leverdisë ekonomike për mirëmbajtjen e saj, tha sot Ministri për Transport dhe Lidhje, Goran Sugareski.

Ai ceku se Maqedonia është vetëm vend transit, ndërsa për ndërprerjen e linjës kanë vendosur Serbia dhe Greqia, përcjell Telegrafi Maqedoni.

“Gjatë muajve të kaluar kishim takime me përfaqësues të Qeverisë së Serbisë dhe që nga prilli na është thënë se me siguri linja do të ndërpritet nga 1 tetori, për shkak që bëhet fjalë për mospasje të leverdisë ekonomike për Serbisë. Maqedonia është shtet transit dhe bëhet fjalë për politikë afariste të autoriteteve hekurudhore të Serbisë dhe Greqisë. Megjithatë, në periudhën e ardhshme do të bëjmë gjithkça që mundemi që të gjejmë mënyra alternative se si linja të vazhdohet”, deklaroi Sugareski, përcjell Telegrafi Maqedoni.

I pyetur për urën hekurudhor në Stobi e cila para disa ditëve u shemb dhe nëse janë bërë llogaritje se sa do të shkojë riparimi i saj, ministri Sugareski tha se për momentin nuk janë bërë llogaritje dhe se sipas informacioneve që posedon ai, në 15 deri 20 ditët e ardhshme do të riparohet ura./Telegrafi/