Suarez: El Clasico nuk është vendimtare, katër skuadra në garë për titull

Sulmuesi i Barcelonës, Luis Suarez ka theksuar se ndeshja El Clasico e së shtunës ndaj skuadrës së tij dhe Real Madridit në Bernabeu nuk do të jetë vendimtare, pasi në garën për titull janë edhe Valencia dhe Atletico Madridi.

Suarez mendon se gara për titullin e kampionit në kampionatin spanjoll do të jetë e fortë me katër skuadra që do të sfidojnë.

Uruguaiani këmbëngul se si Valencia ashtu dhe Atletico Madrid, të cilët zënë vendin e dytë dhe të tretë – janë gjithashtu të përfshira në garën e titullit të La Ligës këtë sezon.

Sulmuesi i Barçës ka folur edhe për ndeshjen e ardhshme që katalunasit e zhvillojnë në Santiago Bernabeu ndaj Real Madridit, ku mendon se kjo nuk do të jetë vendimtare, por shumë e vlefshme.

“Ka shumë sfidues për titullin në La Liga këtë sezon”, ka thënë Suarez për Movistar pas fitores së 4-0 ndaj Deportivo La Corunas.

“Valencia dhe Atletico Madrid po shtyjnë fortë këtë sezon dhe do të jetë një garë emocionuese”.

“Sigurisht një fitore në Bernabeu do të ishte një shtytje masive për ne, por kjo lojë nuk do të jetë vendimtare”.

“Unë jam i kënaqur me performancën time (kundër Deportivos) dhe gjithashtu ekipit, ishte një pikë e rëndësishme dhe një paraqitje e fortë”, përfundoi uruguaiani. /Telegrafi/