Spanja dhe Portugalia regjistrojnë temperaturat e tyre më të larta ndonjëherë gjatë prillit

Spanja dhe Portugalia kontinentale regjistruan temperaturat e tyre më të larta ndonjëherë gjatë prillit, pasi një valë e hershme e të nxehtit goditi rajonin, me merkurin në disa vende që arriti pothuajse 39 gradë Celsius, thanë zyrtarët të premten.

Sipas mediave të huaja, përcjell Telegrafi, temperaturat arritën 38.8°C të enjten në aeroportin e Kordobës në Spanjën jugore, që besohet të jetë një rekord për muajin prill, tha agjencia shtetërore e motit AEMET në Twitter.

Rekordi i mëparshëm i temperaturës së lartë në Spanjën kontinentale u vendos në vitin 2011 në qytetin lindor të Elche, kur merkuri arriti në 38.6°C.

Ndërsa në Portugali, temperaturat në qytetin qendror të Mora arritën në 36.9ºC të enjten, duke thyer rekordin prej 36ºC të vendosur në prill 1945 në qytetin verilindor të Pinhao, tha agjencia e motit Ipma e vendit.

Large parts of Spain and Portugal are gripped by heat and drought.
Cordoba airport set a new April temperature record for mainland Spain of 38.8°C on Thursday, says @AEMET_Esp#StateofClimate #ClimateChange pic.twitter.com/npsgbdOr00

— World Meteorological Organization (@WMO) April 28, 2023

Por të dhënat e përkohshme në të dy vendet ende nuk janë konfirmuar në një proces që mund të zgjasë disa ditë.

Temperatura më e lartë për të gjithë Spanjën në muajin prill u regjistrua në vitin 2013 në Ishujt Kanarie në brigjet veriperëndimore të Afrikës, kur merkuri arriti në 40.2°C.

Spanja dhe Portugalia fqinje janë kapluar nga një valë e nxehtë jashtëzakonisht e hershme, e nxitur nga një masë e ajrit të nxehtë dhe të thatë që vjen nga Afrika.

Temperaturat filluan të ulen pak në Portugali të premten dhe Spanja pritet të shohë të njëjtën gjë në fundjavë.

Temperaturat përvëluese kanë shkaktuar paralajmërime për zjarre dhe përkeqësim të kushteve të thatësirës, të cilat tashmë kanë bërë që disa fermerë të mos mbjellin fara këtë vit.

Parashikimet afatgjata të motit tregojnë se Spanja dhe pjesë të tjera të Evropës Perëndimore do të vazhdojnë të përballen me temperatura jashtëzakonisht të ngrohta muajin e ardhshëm, duke ofruar pak lehtësim nga rreziqet e thatësirës. /Telegrafi/