Sot fillon debati për ndryshimet në Kodin Zgjedhor

Në Kuvendin e RMV-së, për sot është caktuar të mbahet seanca e Komisionit për sistem politik dhe marrëdhënie mes bashkësive, ku pritet të fillojë diskutimi për amendamentet për propozim-ndryshimet e Kodit zgjedhor, të cilat parashohin një njësi zgjedhore dhe lista të hapura.

Për dy propozim ligjet e partive me të vogla, si për një njësi zgjedhore, ashtu edhe për Ligjin për lista të hapura, BDI dhe OBRM-PDUKM kanë dorëzuar mijëra amendamente. Kësisoj debati rreth këtyre amendamenteve nuk pritet që të përfundojë para shpërndarjes së Kuvendit, që është caktuar për më 11 shkurt, për shkak të mbajtjes së zgjedhjeve të parakohshme parlamentare më 12 prill.

Në pajtim me Rregulloren e Kuvendit, duke e pasur parasysh se bëhet fjalë për propozim ligje, të cilat nuk janë me flamur të BE-së, nuk mund të kufizohet debati i anëtarëve të Komisionit.

Grupi parlamentar i BDI-së, i arsyeton mijëra amendamentet e dorëzuara si vërejtje se procesi për ndryshimin e Kodit zgjedhor, po zhvillohet në një kahje, njëanshëm dhe se ndryshimi i rregullave të lojës para zgjedhjeve është precedent i rrezikshëm, me të cilën mund të ballafaqohet skena politike në vend. Ata vlerësojnë se rregullat e lojës për zgjedhje patjetër të miratohen me konsensus, në pajtim me të gjitha partitë politike.

Qëndrim të njëjtë ndan edhe OBRM-PDUKM, të cilët thonë se çdo Kod zgjedhor, duhet të miratohet me konsensus të gjerë partiak dhe sa më larg nga momenti i zgjedhjeve.

Nga ana tjetër LSDM i mbështet ndryshimet e Kodit zgjedhor, me të cilën parashihet formimi i një njësie zgjedhore dhe lista të hapura të deputetëve. Ajo kërkon nga OBRM-PDUKM dhe BDI, t’i tërheqin amendamentet dhe të fillojë debati./Telegrafi/