Skandali i VAR-it në ndeshjen e Barcelonës, ish-gjyqtari: Shqetësuese, joreale, e pabesueshme

Në ndeshjen e xhiros së 29-të të kampionatit spanjoll të futbollit të dielën, Barcelona mposhti Gironan me rezultat 4-1 dhe është sërish tri pikë para rivalit më të afërt Real Madridit. Skuadra katalunase kaloi në epërsi në minutën e 44-të me autogolin e Ladislav Krejcit, por mysafirët barazuan në minutën e 53-të me Arnaut Danjuma.

Robert Lewandowski në minutën e 61-të i kaloi vendësit në avantazh dhe në minutën e 77-të e zgjidhi çështjen e fituesit me golin e dytë. Ferran Torres shënoi golin e fundit të ndeshjes me golin e katërt në minutën e 86-të. Barcelona mund të kishte festuar më bindshëm, por Eric Garcia në minutën e 61-të dhe Lamine Yamal në minutën e 89-të goditën portën.

Ish-gjyqtari ndërkombëtar Xavier Estrada Fernandez është treguar brutalisht i sinqertë në rrjetet sociale, këtë herë pasi u publikua një regjistrim audio i një komunikimi në dhomën VAR nga ndeshja Barcelona-Girona. Ai shprehu dyshime nëse këto incizime janë montuar apo gjyqtarëve thjesht nuk u është thënë se çfarë duhet të kontrollojnë.

Për kujtesë, në Spanjë, komunikimi midis dhomës VAR dhe gjyqtarit në fushë është i disponueshëm publikisht pasi të publikohet nga liga. Estrada njihet si një nga kritikët më të zëshëm të Komitetit të Arbitrave Spanjoll (CTA), teknologjisë VAR dhe vendimeve të arbitrimit në futbollin vendas.

Këtë herë ai është tronditur nga regjistrimi audio nga ndeshja mes Barcelonës dhe Gironas, konkretisht nga situata në të cilën gjyqtari Pulido Santana fillimisht ka dhënë një faull në buzë të zonës së rreptësisë pas duelit mes Asprilla dhe Fermin, e më pas ka ndryshuar mendje dhe ka shënuar një faull ndaj sulmuesit të Barcelonës.

Lexo po ashtu Barcelona i kundërpërgjigjet Osasunas për Inigo Martinez

Gjyqtari i VAR-it më pas thirri Pulido Santanan që të rishikonte personalisht pamjet dhe të vlerësonte nëse faulli kishte ndodhur brenda zonës së penalltisë, pasi Fermin ishte tashmë në vijën e zonës së penalltisë në momentin e kontaktit, gjë që do të thoshte një goditje dënimi për Barcelonën.

Në audion e publikuar, ata dëgjohen duke thënë nga dhoma e VAR-it: “Ju rekomandoj ta shikoni videon”. Por në asnjë moment Pulido Santana nuk tha se mund të ishte një faull brenda zonës së penalltisë, gjë që zemëroi veçanërisht Estradën. “Jo realiste. E pabesueshme. E papërgjegjshme. Shqetësuese. Një tjetër skandal në VAR”, shkruan ai në një postim në X.

Së fundi, ai kritikoi më tej Federatën Spanjolle të Futbollit (RFEF) dhe organizatën e arbitrave CTA, duke sugjeruar se publiku mund të mashtrohet nga pamjet e modifikuara. “VAR nuk i thotë çfarë të kontrollojë! A janë të montuara pamjet? Pse nuk po i shpjegojnë se çfarë të vlerësojë? Dhe nëse po, pse nuk dëgjohet? Kush i përgatit këto klipe?”, pyeti Estrada. /Telegrafi/