Sitnica vërshon shtëpi dhe toka të punueshme në Mitrovicë

Përmes një komunikate Komuna e Mitrovicës, njofton se lumi Sitnica ka dalë nga shtrati duke vërshuar kështu disa shtëpi dhe qindra hektarë tokë të punueshme.

Drejtori për Mbrojtje dhe Shpëtim në këtë komunë, Musa Dragaj, i cili ka dalë menjëherë në vendin e ngjarjes, ka thënë se situata është mjaftë serioze, ndërsa Sitnica po vazhdon të rrit nivelin dhe kjo gjë paraqet rrezik serioz për vërshim shumë më të madh në shtëpitë dhe bizneset përreth lumit.

Sipas tij, nga Tuneli i Bairit e deri në fshatin Frashër, janë vërshuar disa qindra hektarë tokë të punueshme, kështu që e tërë ajo hapësirë që shtrihet nga lumi Sitnica, në gjerësi disa qindra metra deri në hekurudhë dhe gjatësi prej rreth dy kilometra, është e mbuluar e tëra me ujë.

Gjithashtu Dragaj, ka informuar se Sitnica ka vërshuar edhe 4-5 shtëpi në lagjen “2 korriku”, afër urës kryesore mbi këtë lum si dhe është duke u rrezikuar seriozisht edhe Parku i Bizneseve.

Ai ka njoftuar gjithashtu se shiu ka dëmtuar edhe rrugën që lidh “Lagjen e Doktorëve” me “Kroin e Vitakut”, në very të qytetit, ku gjysma e rrugës së asfaltuar është shembur tërësisht dhe paraqet rrezik për qarkullimin e njerëzve dhe automjeteve.

Sipas tij, meqë Sitnica po vazhdon të fryhet nga uji, atëherë situate pritet të vështirësohet edhe më shumë dhe sopas tij kjo gjë paraqet rrezik të madh për njerëzit që jetojnë përreth. Për këtë gjë, ai i fton të gjithë që të jenë të kujdesshëm dhe në rast që kanosen nga ndonjë rrezik ta lajmërojnë menjëherë drejtorinë.