Ruani butësinë dhe formën e rrobave prej viskoze duke ndjekur disa hapa të thjeshtë për larje dhe tharje të kujdesshme
Viskoza, e njohur për butësinë dhe ndjesinë luksoze, është një material i brishtë që kërkon kujdes të veçantë gjatë larjes dhe tharjes. Megjithëse shumica e veshjeve prej viskoze mund të lahen në rrobalarëse, detajet e trajtimit janë vendimtare për të ruajtur formën dhe pamjen e tyre.
Shumë shpesh, viskoza kombinohet me fibra të tjera si poliesteri, pambuku apo najloni, gjë që mund ta bëjë pëlhurën edhe më delikate. Prandaj, lexoni gjithmonë etiketën dhe trajtojeni rrobën sipas rekomandimeve.
Si ta përgatisni rrobën
Para larjes, rrobat prej viskoze gjithmonë kthejini nga ana e kundërt dhe vendosini brenda një qeseje mbrojtëse me rrjetë. Kjo do t’i mbrojë nga fërkimi me pjesë të tjera dhe do të parandalojë zvarritjen ose dëmtimin e fibrave, transmeton Telegrafi.
1. Zgjidhni temperaturën dhe programin e duhur
Përdorni një program të butë për larje, në maksimum 30°C. Shmangni centrifugën e fortë - rrotullimi i shpejtë mund të shkaktojë rrudha të vështira për t’u hequr.
2. Preferojeni larjen me dorë
Etiketa “viskozë” nuk garanton që pëlhura është 100% viskozë. Për rroba me përbërje të përzier, larja me dorë shpesh është zgjedhja më e sigurt. Përdorni ujë të vakët dhe detergjent të lëngët për rroba delikate.
3. Si të trajtoni njollat
Për njollat nga djersa ose deodoranti, njomeni zonën e njollosur me një tretje të lehtë sode buke dhe uji për disa minuta para se ta lani. Kjo ndihmon në neutralizimin e aromës dhe zbutjen e njollës.
4. Përdorni zbutës
Zbutësi ndihmon në ruajtjen e butësisë. Mos i shtrydhni shumë rrobat - përkundrazi, pas larjes, vendosini mbi një peshqir të pastër dhe lërini ujin të largohet natyrshëm.
5. Tharja
Shkundeni lehtë pëlhurën për të evituar rrudhat dhe vendoseni të thahet në një sipërfaqe të sheshtë. Viskoza nuk duhet të thahet në makinën e tharjes, sepse nxehtësia mund të shkaktojë tkurrje dhe rrudhje të pariparueshme.
6. Ruajtja
Rrobat e thurura nga viskoza mos i varni, por palosini me kujdes për të shmangur zgjatjen e tepërt apo deformimin. Mbajini larg rrezeve direkte të diellit gjatë tharjes, pasi drita e fortë mund të zbehë ngjyrën.
Këshillë shtesë: Nëse keni rroba viskoze të cilat përdoren rrallë (si fustanet elegante), është mirë të përdorni qese pambuku për ruajtje në dollap, që pëlhura të marrë frymë dhe të mos mbledhë lagështi. /Telegrafi/
