Si krahasohet Omicron me variantet e tjera të COVID-19?

Më 24 nëntor 2021, shkencëtarët në Afrikën e Jugut raportuan një variant të ri të coronavirusit me një numër më të madh mutacionesh sesa u gjetën në variantet e tjera.

Dy ditë më vonë, Organizata Botërore e Shëndetësisë (OBSH) tha se varianti i ri, i quajtur Omicron, ishte një variant shqetësues (VOC).

Dhe njoftimi bëri që shumë vende të vendosin kufizime udhëtimi, shkruan Al Jazeera, përcjell Telegrafi.

Por çfarë janë mutacionet?

Të gjithë viruset ndryshojnë dhe coronavirusi SARS-CoV-2 ka vazhduar të ndryshojë që kur u shfaq në fund të vitit 2019.

Një mutacion është një ndryshim në kodin gjenetik të një virusi dhe një virus që pëson mutacion njihet si një variant.

Disa variante të coronavirusit përhapen më lehtë se të tjerët, gjë që mund të çojë në rritje të shkallës së infeksionit.

Një rritje e infeksioneve mund të ngarkojë më shumë burimet e kujdesit shëndetësor, duke çuar potencialisht në më shumë shtrime në spital dhe vdekje.

Sipas shkrimit të Al Jazeera, ekspertët besojnë se ka të paktën 50 mutacione në variantin e ri, me 32 mutacione në proteinën S, pjesa e virusit që hyn në qelizat njerëzore.

Shkencëtarët kanë thënë se mutacione të ngjashme të parë në variante të tjera janë shoqëruar me transmetim më të lartë dhe një shans më të lartë për t’i shpëtuar mbrojtjes imune të trupit, krahasuar me llojin origjinal të virusit.

Mutacionet identifikohen me shkronja dhe numra të tillë si D614G.

Si emërtohen variantet?

OBSH ka identifikuar pesë VOC dhe tetë variante me interes (VOI). Që nga maji 2021, ata janë emëruar sipas shkronjave të alfabetit grek që fillojnë me Alfa, përcjell Telegrafi.

Sipas kësaj, shkronjat e caktuara të radhës supozohej të ishin Nu pastaj Xi, por sipas OBSH-së, “Nu ngatërrohet shumë lehtë me “i ri” dhe Xi nuk u përdor sepse është një mbiemër i zakonshëm”.

Në vend të kësaj, u përdor shkronja e 15-të, Omicron.

Si krahasohet Omicron me variantet e tjera?

OBSH ka thënë se rreziku global i variantit Omicron është “shumë i lartë”.

Aktualisht, varianti Delta, i dokumentuar për herë të parë në Indi në tetor të vitit 2020, është lloji më dominues, që përbën më shumë se 99 për qind të rasteve të sekuencës globale.

Të dielën, OBSH tha se nuk është ende e qartë nëse Omicron është më i transmetueshëm ose shkakton sëmundje më të rënda në krahasim me variantet e tjera.

Organizata shtoi se “vaksinat mbeten kritike për reduktimin e sëmundjeve të rënda dhe vdekjeve”.

Provat paraprake sugjerojnë se mund të ketë një “rritje të rrezikut të riinfeksionit me Omicron në krahasim me variantet e tjera shqetësuese, por informacioni është i kufizuar”, është thënë më tej.

Epidemiologu i Afrikës së Jugut, Salim Abdool Karim, tha të hënën se nuk ishin mbledhur të dhëna të mjaftueshme për të përcaktuar implikimet klinike të Omicron në krahasim me variantet e mëparshme dhe se riinfeksionet ishin të mundshme, por se njerëzit e vaksinuar kishin më pak probabilitet për të zhvilluar simptoma serioze.

Ekspertët thonë se më shumë informacion do të ketë në ditët dhe javët në vijim pasi virusi të përhapet më gjerësisht dhe studiuesit të shohin se si funksionojnë së bashku mutacionet e Omicron.

Si të mbroni veten dhe të tjerët?

OBSH këshillon hapat e mëposhtëm për të mbrojtur veten dhe për të parandaluar përhapjen e COVID-19:

Vaksinohuni;

Vishni një maskë;

Ruani distancën fizike;

Ajrosni hapësirat e brendshme;

Mbani higjienë të mirë;

Vetë-izolohuni nëse keni simptoma. /Telegrafi/