Shtyerja dhe mungesa e Prokurorëve ndër shkaqet e dështimeve të seancave gjyqësorë në bazë të raportit për Rajonin e Pejës

Gjykata Themelore e Pejës dhe degët e saj në Istog, Klinë dhe Deçan kanë publikuar raportin statistikor për seancat gjyqësore të mbajtura gjatë muajit shtator 2024.

Sipas këtij raporti të publikuar në faqen zyrtare në Facebook, gjatë këtij muaji janë caktuar gjithsej 452 seanca gjyqësore, prej të cilave 409 janë mbajtur me sukses, ndërsa 43 kanë dështuar për arsye të ndryshme.

Përtej numrit relativisht të vogël të seancave të dështuara gjatë muajit shtator, analiza tregon se shumica e këtyre dështimeve kanë ndodhur për arsye të kërkesave për shtyrje dhe mungesës së prokurorit.

Sipas raportit, 121 seanca kanë dështuar si pasojë e kërkesave për shtyrje, ndërsa 58 seanca nuk janë realizuar për shkak të mungesës së prokurorit.

Megjithëse numri i përgjithshëm i seancave të dështuara mbetet i kontrolluar krahasuar me numrin e përgjithshëm të seancave të mbajtura, këto dy faktorë kryesorë vazhdojnë të paraqesin sfida të rëndësishme për funksionimin e rregullt të gjykatave.

Në disa raste, edhe mungesa e të pandehurve, mbrojtësve, palëve të dëmtuara apo dëshmitarëve ka kontribuar në dështimin e seancave, duke shkaktuar vonesa në zgjidhjen e çështjeve gjyqësore dhe ngarkesë shtesë për sistemin gjyqësor.

Sipas këtij raporti nga Departamenti i Krimeve të Rënda, prej 24 seancave të caktuara, vetëm 11 janë mbajtur, ndërsa 13 seanca kanë dështuar.

Në Departamentin e Përgjithshëm, janë caktuar 242 seanca, prej të cilave 217 janë mbajtur, ndërsa 25 kanë dështuar.

Ndërsa sa i përket Departamentit për të Mitur, nuk janë raportuar seanca të mbajtura për këtë muaj.